Дагъустандин госуниверситетда кIелунин 2023-2024-йис патал вуздиз кьабулдай кампаниядин месэлайриз талукь яз ректор Муртазали Рабаданован пресс-конференция кьиле фена. ИкI, вуздин ректорди къейд авурвал, кIелунин 2023-2024-йисуз вузди бакалавриатдин — 40, магистратурадин 31 рекьяй ва 7 пешекарвиляй жегьилар кьабулда. КIелунин 2023-2024-йисан вахтунда бюджетдин гьисабдай тир чкайрин умуми кьадар 1469-даз барабар жеда (алатай йисуз – 1505), абурукай бакалавриатдиз — 1177, магистратурадиз – 307, специалитетдиз 32 студент кьабулда.
Идалайни гъейри, высший образованидин программайрай икьрардин бинедаллаз кьабулдай чкайрин санлай къачур кьадар 2729-даз барабар я, абурукай бакалавриатди – 1176, магистратуради – 1148, специалитетди 405 чка тешкилзава.
«Кеферпад-Кьиблепад» коридордин логистикадин хилер виликди тухунихъ галаз алакъалу яз логистикадин хилен пешекарар гьазурунин игьтияж арадал атунин себебдалди, 2023-йисуз университетди высший образованидиз талукь программаяр гьазурнава: бакалавриатдин — «Логистика ва метягь агакьарунин хилер идара авун», «Информациядин системаяр — бизнесда ва логистикада», «Логистикадин системаяр ва гьерекатар идара авун»; магистратурадин — «Логистика ва метягь агакьарунин хилер идара авун» ва «Рекъемрин логистика»; специалитетдин – «Таможнядин логистика».
Винидихъ къалурнавай программаяр акьалтIарайбурувай карханайрин бизнес-гьерекатар дуьздаказ кьиле тухуз, харжияр ва кимивилер тIимил хьунал гъун лазим тир финансрин, къуллугърин ва информациядин хилер сад авунихъ галаз алакъалу месэлаяр гьялиз жеда.
Бакалавриатдинни специалитетдин программайрай государстводин бюджетдин гьисабдай тир жуьреда кIелун патал документар 20-июндилай кьабулиз башламишда. ЭкечIунин имтигьанар галачиз кьабулдайбур патал документар кьабулунин кIвалах 25-июлдин няналди давам жеда.
Пресс-конференциядал М.Рабаданова къейд авурвал, высший образованидин программайрин чирвилер гунин къайдада виле акьадай хьтин дегишвилер тунва. Вуздиз кьабулунал разивал гунин къайда къуватдай вегьенва. Гила абитуриентри КЦП-дин сергьятра аваз (госбюджетдин чкаяр) экечIун патал кьилди арза ва гьакъидин бинедаллаз кIелзавай чкаяр патал кьилди арза гун лазим я. Арзада абитуриентди вич патал виридалайни гзаф ва тIимил важиблу тир пешекарвилер къалурун лазим я.
КIелунин 2023-2024-йисуз гьакIни Белгороддин областдин, Донецкдин ва Луганскдин халкьдин республикайрин, Херсондин ва Запорожьедин областрин юкьван умуми образованидин программаяр и мулкар Россиядин Федерациядиз кьабулдалди акьалтIарай ксар кьабулунин кьетIенвилерни тайинарнава. ИкI, ихьтин агьалийриз вузрик экечIунин имтигьанрай умуми образованидин тарсарай суьгьбетар авунин нетижада экъечIдай мумкинвал жеда.
Идалайни гъейри, кIелунин 2023-2024-йисан вахтунда вузди юкьван пешекар образованидин 8 пешекарвиляй кьабулда. СПО-дин программайрай кьабулдай бюджетдин чкайрин санлай къачур кьадар — 50-даз, икьрардин бинедаллаз кьабулдай чкайрин кьадар 480-даз барабар я.
2023-йисуз университетди СПО-дин «Социальный кIвалах» ва «ТIебиатдин комплексрин экологиядин жигьетдай хатасузвал» программайрай сифте сеферда яз абитуриентар кьабулда.
Амина Муслимова
