Чилин винел агъзурдалай виниз пешеяр ала лугьуда. Инсанар яшамиш хьун патал абур гьар сад лазим я. Амма духтурвал эвелимжиди, кьилинди я лагьайтIа, зун кIусни ягъалмиш туш, гьикI хьи, инсанрин сагъламвал хуьзвайди, герек макъамда куьмекдиз къвезвайди духтур я. Ам вичин кIвалахдин гъавурда хьунилай, кефсуз хьайи ва я дуьшуьшдик акатай инсандин кьисмет адан бажарагъдилай аслу жезва. Зи фикирдалди, пешекарвал къачуз физвай жегьилар лазим тир вири хилерай мягькем чирвилер авайбур хьун герек я. Зи къенин суьгьбет СтIал Сулейманан райондин центральный больницада хирург-уролог, гьамиша къайгъуйрин юкьва аваз зегьмет чIугвазвай Мегьемедшериф Сулейманович Гьасанбеговакай я.
И больницада духтуррин кьадар вишелай виниз алатнава. Абурун арадай еке гьуьрмет, авторитет авайбурукай сад тир Мегьемедшериф Сулеймановича ина зегьмет чIугваз 30 йисалайни гзаф я. Ада и пешедиз вичин уьмуьрдин 36 йис бахшнава. И йисара ада операцияр авур, гьакI сивин ва гъилин куьмекар агакьай цIудралди начагъбур сагъ хъхьана. Абуру духтурдиз рикIин сидкьидай чими келимаяр лугьузва.
— Завай чпиз куьмек хьайи ксарилай кIвалахда зи рикIик ашкъи-гьевес кутазвай чими келимаяр агакьун заз вири жуьредин шабагьрилайни багьа я, — лугьузва Мегьемедшериф Сулеймановича.
Духтурдин тIварцIихъ алхишдин келимаяр лугьузвайбурун арада сад-садан гуьгъуьналлаз са шумуд операция авур ва герек куьмекар вичин вахтунда агакьай и цIарарин автор, гьакIни Куьребегов Надир (Кьасумхуьр), Рамазанов Агьмед (Кьулан СтIал), Шерифов Ражидин (Герейханован хуьр), Эфендиев Юнус (Агъа СтIал-Къазмаяр) ва масабур ава. Гаф кватай чкадал лугьун, операцияр кьилиз акъуддайла, абурулай гуьгъуьниз азарлуйрин сагъламвал гуьнгуьна хутадайла, Мегьемедшериф духтурдин эрчIи гъилер тир медсестрайри — Инаята, Дианади, Наидади, Таибата, Альбинади, Марьяма ва масабуруни намуслудаказ зегьмет чIугвазва. Абуру азарлуйриз чпелай алакьдай вири жуьредин куьмекар гузва. Сагърай чеб!
Азарханада авайла, Мегьемедшериф духтур вичин пешедал кьару кас тирди за гьасятда кьатIанай. И кар ам гьар са азарлудав эгечIзавай тегьердайни хъсандиз аквазвай — палатайриз физ, начагъбурал кьил чIугвадай, абурун гьал, тIал-квал хабар кьадай. Зарафатарни хъувуна, гьар садан гуьгьуьл ачухардай…
Мегьемедшериф 1961-йисуз Хив райондин Дардархуьре дидедиз хьана. Буба Сулеймана — муаллимвиле, диде Райгьаната колхозда, гуьгъуьнлай совхозда рабочий яз кIвалахна. Абурувай Мегьемедшерифал туькIвей тербия агакьна. Сифтегьан классра — хайи хуьре, гуьгъуьнинбур Дагъустандин Огни шегьерда кIелна. 1978-йисуз Кашанхуьре мектеб акьалтIарай ада, яргъалди фикир тавуна, Махачкъаладиз фена, вичиз аял вахтарилай кIани пеше къачун патал документар мединститутдиз вугана. Имтигьанар хъсандиз вахкана, конкурсдайни акъатна. Вузда ада хъсандиз кIелна. Урологвилелай гъейри, ада хирургвилин пешени къачун кьетIна. И мурад кьилиз акъудун патал Мегьемедшериф Гьасанбегов Казань шегьердиз физва, ана кIелун давамарзава. Ина адаз кIвалахни гузва. ИкI са шумуд йисуз жегьил пешекарди Дагъустандивай яргъа зегьмет чIугвазва. 1991-йисуз вичин пешедай духтур кIанзавайдакай хабар хьайила, ам хайи Ватандиз хквезва. Кьасумхуьрел цIийи больницада вичин зегьметдин рехъ давамарзава. Кьилин категориядин хирург-уролог тир Мегьемедшериф Сулейманович гзаф кьадар шабагьрин сагьибни я. Кьилди къачуртIа, адаз “Дагъустан Республикадин лайихлу духтур” тIвар ганва. Ам РД-дин здравоохраненидин отличник я.
Чаз Мегьемедшериф духтурдихъ мягькем сагъламвал, кIвалахда мадни еке агалкьунар хьана кIанзава.
Райсудин Набиев,
зегьметдин ветеран
