Дарманрин набататар
И набатат акун тавунвай, ам чин тийизвай инсан бажагьат ава. Къерехра ам экъечI тавунвай рекьер, жигъирар жагъурун четин месэла я. Адетдин эчIел хьиз булдалди гьалтзавай дамардин пешиник дармандин такьатар квайди гьеле дегь девиррилай малум я.
Пешекарри тестикьарнавайвал, тIебиатда дамардин пешинин са шумуд жуьре ава. И набататдин пешерикайни, тумуникайни, гьатта дувулдикайни сагъардай такьатрин еринда халкьдин медицинада гегьеншдиз менфят къачузва. Дамардин пеш иви фин акъвазарунин, хирер-кьацIар хьайи чкаяр фад сагъарунин карда ишлемишзава. Адак калий, гликозидар, алкалоидар, витаминар ва маса хийирлу затIар ква. Пешер хъсандиз кьурурна, кьуру чкада хвейитIа, гьабурукайни, гьакIни тумарикайни кьве йисан вахтунда менфят хкудиз жеда. Кьилди къачуртIа, адавай уьгьуьдиз, мекьивал себеб яз хьайи кефсузвилиз, бронхитдиз, хуквадинни ратарин азарриз аксивал ийиз жеда. Иштягь хкаждай, тIуьрди иливардай гьерекат къайдадик кутудай къуватни ава дамардин пешинихъ.
Дамардин пеш ва адакай гьазурнавай гьалима инсан секинардай такьат-дарман хьизни ишлемишиз жезва. Амансуз, ахварсуз хьайила, гьалима хъун теклифзава. Кьилин тIал явашардай, рикIинни дамаррин кIвалах хъсанардай такьатарни ква.
Гьелбетда, дамардин пешинихъ халкьдин медицинада менфят къачуз жедай хийирлувилер мадни гзаф ава. Амма пешекардин иштираквал авачиз, гьикI кIандатIани хьурай лагьана, жуьреба-жуьре набататрикай, гьа жергедай яз дамардин пешиникайни менфят къачун теклифзавач. Малум тирвал, гьар са набататдик хийирлу такьатрилай гъейри зарарлубурни хьун тIебии кар я. Гьавиляй кар чидайбурун теклифрал амалун важиблу я.
«Лезги газет»
