Дагъустандин госуниверситетдин студент Эдуард Абдулхаликьова Вирироссиядин “Студенческий лидер-2020” конкурсдин округдин 18 лагьай паюна (этап) кьвед лагьай чка кьуна. Ада Кеферпатан Кавказдин Федеральный округдин финальный паюна иштиракдай ихтияр къазанмишна.
И конкурсдизни коронавирусди таъсирна. Ам Пятигорскдин госуниверситетдин технобизнеспарк базада дистанциядин форматда аваз кьиле фена. Кьве юкъуз студентар СКФО-дин башчи студент жез алахъна. Абуру ирид тапшуругъ (“Автопортрет”, “2к1”, “Профсоюздин комитетдин заседание”, “Правовое ориентирование”, “Профтест” “Блиц”, “Сюрприз”) кьилиз акъудна.
— И жуьредин конкурсда за пуд сеферда иштиракна,- лугьузва Абдулхаликьова.- Сифтедай за чи университетдин конкурсда 5-чка кьуна. Республикадин конкурсда зун кьвед лагьай чкадал акъатна. ЦIи за региондин ва округдин конкурсра кIвенкIвечи чкаяр кьуна. Финалдани лайихлу чка кьун патал гьазур жезва зун.
Къейд авун лазим я хьи, Вирироссиядин “Студенческий лидер-2020” конкурсдин финал 19-27-сентябрдиз кьиле фида. Ана Россиядин 66 региондин 130 вуздин 300-дав агакьна студентри чпин алакьунар къалурда, гъалибвал къазанмишун патал чалишмишвалда.
* * *
Дагъустанви Рамазан Булгаева гьар йисуз тешкилзавай Вирироссиядин “Вун тек туш” конкурсда иштиракна ва гъалибвал къачуна. Конкурс общественностдин фикир яшайишдин месэлайрал желб авун патал тешкилнавайди я.
Россиядин яратмишдай гзаф кьадар кIватIалри, кьилди ксари иштиракай и мярекат “Режиссёррин ва сценаристрин кьилин школа” образовательный идаради тешкилнавайди тир. Финалдиз акъатдалди конкурсантри онлайн жуьреда кьиле тухузвай пуд паюна чпин алакьунар къалурна.
Конкусрдиз агакьарнавай кIвалахар кьве патал пай жезвай: яшайишдин месэлайрикай ролик ва гьа и темадай сценарий кхьенвай ролик. Абурузни вад жуьредин дережадиз килигна махсус призар гузвай.
“Любители” категориядай яшайишдин “Регьимлувили сад ийизва” реклама гваз майдандиз экъечIай Рамазан Булгаева сад лагьай чка кьуна. Жегьил режиссердиз диплом ва “Режиссёррин ва сценаристрин кьилин школадин” мастерскойра кьве йисуз чирвилер къачудай сертификат гана.
* * *
Дагъустандин жегьилриз Вирироссиядин “Лидеры международного сотрудничества” конкурсда иштиракун патал эверзава. Конкурсдин макьсад региондин ва федеральный дережада международный проектар ва программаяр уьмуьрдиз кечирмишзавай Россиядин бажарагълу ва активный жегьилар жагъурун, абуруз куьмекар гун я. Конкурсдин нетижайрин бинедаллаз гъалибвал къачур 50 кас тайинарда, абуруз образованидин ва тежрибадин модулра иштиракиз Москвадиз теклифда.
* * *
“Таврида -АРТ” фестиваль алай йисан 2-6-сентябрдиз Крым Республикада кьиле фида. Мярекатдин макьсад профессиоанальный сообществояр арадал гъунин, яратмишдай майданар гегьеншарунин карда жегьилриз куьмек гун я. Фестивалди культурадин, искусстводин деятелар, продюсервилин центрайрин векилар, студентар, аспирантар, музыкадин, кьуьлердайбурун коллективар, яратмишдай конкурсрин иштиракчияр санал кIватIда.
Хийир Эмиров
