Гьи хиле зегьмет чIугуртIани, Расим Байрамалиева вич кар алакьдай тешкилатчи, вилик акъвазнавай месэлаяр гьялиз алакьдай тежрибалу, жавабдар пешекар хьиз къалурзавай. Ихьтин ерияр хас тирвиляй, вич жегьил ятIани, Расим къуллугъдин рекьяй вини дережайриз хкаж жезва.
Шад хабар Расим Абдулович и мукьвара “Гьукуматдин сад тир эцигунрин заказчикдин дирекция” ГБУ-дин директордин заместителвиле тайинарнава.
Р.Байрамалиев 1985-йисуз Ахцегь райондин Къурукаларин хуьре къуллугъчидин хизанда дидедиз хьана. Ватанпересвилин, мугьманпересвилин, чIехидаз гьуьрмет авунин, герек макъамда гъвечIидаз куьмек гунин ва инсан кIан хьунин лишанар, къилихар хьун чарасуз тирди Расимаз гьеле гъвечIизамаз адан бубади вичин хсуси чешнедалди чирнавай.
Дагъвиди инсанрин ихтиярар хуьниз талукь чирвилер къачун ва и рекьяй пешекар хьун кьетIна. 2002-йисуз Расим Россиядин МВД-дин Ростовдин университетдин юридический факультетдик экечIна. Анаг агалкьунралди акьалтIарай жегьил пешекардин зегьметдин рехъ Ахцегь райондин къенепатан крарин уголовный розыскдин оперуполномоченный яз кIвалахунилай гатIунна. Тахсиркарвилер дуьздал акъудунин рекьяй жегьил пешекардин агалкьунриз МВД-дин руководстводи лайихлу къиметни гана, адаз Махачкъала шегьердин Киров–ский районда уголовный розыскдин хиле кIвалахун теклифна. Къуллугъ кьилиз акъудунихъ галаз сад хьиз, чирвилерин дережани хкажна кIанзавай. ИкI, Р.Байрамалиева Россиядин МВД-дин къуллугъчийрин пешекарвал хкаждай институтни акьалтIарна, заочнидаказ ДГУ-дин экономикадин факультетдикни экечIна. 2009-йисалай Расим Байрамалиева ЦПЭ-дин терроризмдиз ва экстремизмдиз акси отделенида сифтедай оперуполномоченный, гуьгъуьнлайни отделенидин чIехиди яз кIвалахна.
Дагъларин уьлкведиз бандитар сухулмиш хьайи 1999-йисуз уьтквем дагъви и женгерин яцIа хьана. Ада хайи чилиз вафалувал къалурзавайди мад сеферда тестикьарна. Расим и женгерин иштиракчи, ветеран, са жерге орденрин сагьибни я. Спортдални адан гзаф рикI ала, и рекьяй адахъ мастервилин тIварни ава. Дагъвидиз хас тирвал, намуслувилелди кIвалахзавай Расим Абдуловичахъ цIийи къуллугъдал чIехи агалкьунар хьурай!
Наира Рамазанова
