Чаз камаллу инсанривай ара-ара ван жеда: «Чкади инсан ваъ, инсанди чка гуьрчегарзава. Къешенг шейэр арадал гъиз жедайди я халис устIар, устад». Халкьдин патай гьуьрмет къазанмишун, гьелбетда, лайихлу кар я. Хуьр, район, республика патал авур хъсан крар, гзаф йисар алатайлани, инсанрин рикIелай фидач. И кар тестикьарзавай мисалар тIимил туш. Абурукай сад редакциядиз атанвай чар я. Ана кьве дишегьлиди Агъул, Мегьарамдхуьруьн районра, республикада чIехи къуллугърал хьайи, хейлин шабагьрин иеси Зара Агьмедовна Латифовадин тIварцIихъ хуш келимаяр кхьенва.
Чна вал дамахзава
Зара Агьмедовна заз жаван чIавалай чида. А вахтунда ам ВЛКСМ-дин Мегьарамдхуьруьн райкомдин сад лагьай секретарь тир. Са тIимил вахтундилай датIана инсанрин, иллаки жегьилрин юкьва аваз аквадай зирек, дагъви руша КПСС-дин райкомдин сад лагьай секретарвилин, райисполкомдин председателвилин везифаяр кьилиз акъудна.
Ахпа адан дережаяр мадни хкаж хьана: Дагъустандин обкомдин отделдин заведующий, недай-хъвадай шейэрин промышленностдин, яшайишдин рекьяй таъминардай министр яз, ада республикадин экономика, халкьдин яшайиш вилик тухуник еке пай кутуна.
Гьихьтин жавабдар къуллугърал хьанатIани, адан намуслу, гьакъисагъ кIвалахдилай руководителар рази яз, ам вични гьа заз чидай михьи, къени инсан яз амукьна.
Ада республикада ва районра тешкилзавай гзаф мярекатра иштиракна, зегьметчи коллективрихъ, инсанрихъ галаз гуьруьшмиш хьана, абурун дердийрихъ яб акална, гзафбуруз куьмекни гана.
Зара Агьмедовна республикадин соцобеспеченидин министр тирла, зун Дагъустандин обкомдин 2-секретарь Виктор Коробейникован референт тир. Мегьарамдхуьруьн райондай сад-садан гуьгъуьналлаз еке делегацияр атана Зара Латифовадин патав. Абурун тIалабун, истемишун сад тир: хтана, райондин кьил кьун, райкомдин 1-секретарвал авун. Чара хьанач, эхирни ада разивал гана. Виликдай вич яшамиш хьайи, кIвалахай район тир кьван. Идакай хабар хьайила, министрдин вад заместителни, управленийрин, отделрин заведующиярни Коробейникован патав атана, Зара Агьмедовна министрдин къуллугъдал тур лугьуз. Амма Латифовади районэгьлийрин теклиф чилел вегьенач. Хъфена, райондиз регьбервал гана. Зегьметчи инсанрин патай ада еке гьуьрмет къазанмишна. Инсанвилелди, михьи, намуслу, къени ерийралди. Вичин патав атай гьар садан гъавурда акьуналди. Ам пуд сеферда Дагъустандин Верховный Советдиз депутатвиле хкягъунини и кар успатзава.
Зара Агьмедовна чи дамах, чи халкьдин баркаллу руш, акьалтзавай несилдиз хъсан чешне я.
Важибат Мегьтиева
______________________________________________________________________________________________
Жегьилрин башчи
Зара Агьмедовна ВЛКСМ-дин Мегьарамдхуьруьн райкомдин 1-секретарь тирла, за ЦIийи Филерин юкьван школада физикадин ва химиядин кабинетра лаборантка, пионервожатый яз кIвалахзавай. Хъсандиз рикIел алама, комсомолрин башчиди мукьвал-мукьвал школайрал кьил чIугвадай, жегьилрихъ галаз ачухдиз суьгьбетардай, чи дердияр, къайгъуяр чирдай, жегьилриз талукь месэлаяр гьялун патал вичелай алакьдай вири крар ийидай.
Адаз кьуру хиве кьунар, дамахунар чидачир. Гьар садахъ галаз вичин юлдашрихъ, мукьва-кьилийрихъ галаз хьиз рахадай. Дикъетдивди яб акална, месэладин гъавурда акьаз алахъдай. Школайра, майишатра комсомолрин, жегьилрин семинарар, совещанияр, гуьруьшар тешкилдай. Адахъ галаз хьайи гьар гуьруьшдилай гуьгъуьниз гьевес хкаж жедай, жув патал цIийи крар чир жедай, мадни хъсандиз кIвалахунин ашкъи акатдай. Зара Агьмедовна райондин жегьилрин халис башчи тир. Вич жуьреба-жуьре алакьунар авай инсан тирди ада гуьгъуьнин йисара, партиядин, государстводин, образованидин идарайра кIвалахдайла, мадни успатна. Адан уьмуьр, кIвалахар чна чи веледриз, хтулриз чешне яз къалурна кIанда.
Зулейха Салманова-Баба-заде
