И йикъара Белиж поселокдин 2-нумрадин юкьван школада аялринни жаванрин арада киокушенкайдай кьиле фейи акъажунра Россиядин чемпион лагьай тlвар къазанмишай Саният Давудова тебрикзавай межлис шад гьалара кьиле фена.
Саният Давудовади гьа и школада 4-классда кlелзава. Адан чIехи буба Давуд Давудов ва буба Тажир спортдин рекье чlехи агалкьунар къазанмишнавай тренерар-муаллимар, спортдин мастерар я. Бубади 5 йисавай Саният вичихъ галаз аялриз вердишвилер гузвай секциядиз тухуз хьана. Гьа икl сифте чIехи бубадин, ахпа бубадин гуьзчивилик кваз, спортдал машгъул жез гатlунна.
Ада сифте Белижда, ахпа районда, гуьгъуьнлай республикада кьиле фейи акъажунра кIвенкIвечи чкаяр кьуна.
Алатай йисан ноябрдин вацра республикадин турнирда сад лагьай чка кьур Санията Россиядин чемпионатда иштиракдай ихтияр къазанмишна. Санкт-Петербургда, къастунал кlеви руша, вичихъ галаз бягьсиниз экъечlай са-сад туна. Санията кьуд бягьс кьиле тухвана. Финалда къизгъиндаказ кьиле фейи бягьсина Саният Давудовади Пермдай тир Багъировадал гъалибвал къазанмишна.
Гурлуз кьиле фейи межлисда Дербент райондин кьилин заместитель Садир Эмиргьамзаева, Белиж поселокдин кьил Рамиз Гьабибулаева, Дербент шегьердин кьилин меслятчи, 6-нумрадин спортдин школадин директор Тамерлан Сардарова ва масабуру иштиракна. Абуру рушаз пишкешар гана.
2-нумрадин школадин директор Анжелика Агъабеговади чемпиондиз спортда къазанмишнавай агалкьунрай ва школадин уьмуьрда иштирак авунай гьуьрметдин грамота гана.
Къагьриман Ибрагьимов
