Алай йисан 1-сентябрдиз, Махачкъаладин 26-нумрадин юкьван школадиз фейила, РД-дин Кьил Владимир Васильева дагъустанвийриз Роспотребнадзордин истемишунрал амал авуниз эвер гана.

Региондин регьберди къейд авуна хьи, мукьвара кьиле фейи Оперативный штабдин заседанидал, республикада стIалжемдик азарлубур гзаф жезватIани, къадагъадин шартIар кIевибур тавунин къарар акъуднава. РикIел хуьн лазим я, зул ОРВИ-дик ва гриппдик начагъ жедай вахтни я. Корона­вирусдин тIугъвални хаталу яз амазма.

ГьакI хьайила, малумарна РД-дин Кьили, къе гьар са кас гъавурда тун лазим я. Начагъ тахьун патал чавай истемишзавай вири къайдайрал амал авун чарасуз я. Гзаф инсанри хийир-шийирдин (мехъерар, хайи йикъар ва икI мад) мярекатра иштиракзава ва акваз-акваз больницайриз аватзавайбурун кьадарни артух жезва. Адетдин гьар йикъан серенжемар тамамарун лазим я. Амма гзафбуру гъилер, чин чуьхуьзвач, маскаяр алукIзавач. Анжах полицейскийри и истемишунрал амалзава. Шегьердай маскаяр алукIнавай ксарни лап кьитдаказ аквазва.

Владимир Васильева гьакI рапар (прививкаяр) ядай вахт тирдини рикIел хкана: “Чи агьалийрин саки са пай прививкайрив заландиз эгечI­зава. Хейлин диде-бубайри чпин аялриз рапар ягъуникай кьил къа­къуд­зава. Ихьтин кардиз рехъ гана кIандач. Вакцинацияни чарасуз авуна кIан­завай кар я. Ам сифте нубатда муаллимриз ва духтурриз ийида. Им дуьзни я, гьикI лагьайтIа, абу­ру аялрихъ галаз кIвалахзава.

За винидихъ лагьайвал, гьеле режим кIевиди ийизвач, амма чна виридавай Роспотребнадзордин истемишунар, иллаки общественный транспортда аваз фидайла, кьилиз акъудун истемишзава”.

Диде-бубайрихъ галаз суьгьбетдай вахтундани республикадин Кьили чинрал маскаяр алукIуниз эвер гана.

Чи мухбир