Дагъустандин Гьукуматди гъилевай йисуз АПК-дин хиле 6,7 агъзур касди кIвалахдай чкаяр арадал гъидай фикир авайдакай лагьанай. Гила и рекъем 10 агъзурдал хкидай хиял ава. Идан гьакъиндай, алатай гьафтеда РД-дин Кьил Владимир Васильевахъ галаз гуьруьшмиш хьайила, РД-дин хуьруьн майишатдин ва суьрсетдин министр Абзагир Гьуьсейнова малумарна.
“Эгер йисан сифте кьиляй чна и хиле кIвалахдин 6700 чка тешкилун хиве кьунайтIа, гила чахъ мумкинвилер гзаф хьанва ва хуьруьн майишатдин карханайра 10726 касди кIвалахдай чкаяр арадал гъида. Гьар райондин ва хуьруьн майишатдин карханайрин мумкинвилер фикирда кьуна, чна махсус картаяр туькIуьрзава ва йисан эхирдалди абур уьмуьрдиз кечирмишзавай гьалдал гуьзчивалда. Гьелбетда, налогрин къуллугъдин куьмекни галаз”,- лагьана А. Гьуьсейнова.
Дагъустандин статистикадин управлениди гайи 1-августдин делилралди, республикада регистрация авунвай бейкаррин кьадар 84,6 агъзур касдив агакьзава.
Чи мухбир
