РД-дин хуьруьн майишатдин ва недай суьрсетдин министерстводи 3-4-июлдин йикъара Махачкъалада республикадин “Дагъустандин машмаш” фестиваль кьиле тухудайвал я, — хабар гузва идарадин пресс-къуллугъди.
Гегьенш мярекатдин сергьятра аваз шегьердин Пушкинан тIварцIихъ галай куьчеда машмашар гьасилунал машгъул районрин майданар ачухда, багъманчивал виликди тухунин месэладай илимдинни тежрибадин конференция кьиле тухуда. ГьакIни фестивалдин сергьятра аваз ина хуьруьн майишатдин суьрсет гьасилзавайбуруз ам маса гудай, агьалийриз тIем акакьдай къиметрай ерилу суьрсет маса къачудай мумкинвал гун патал хуьруьн майишатдин ярмарка ачухда, — хабар гузва идаради.
Къейд ийин, дагълух Дагъустандин мулкарин арада виридалайни гзаф кьадарра машмашар кьве муниципалитетди — Гергебиль ва Унцукуль районри битмишарзава. Инра гьасилнавай суьрсет гьялдай чIехи заводарни ава. Машмашрикай гьазурнавай мижеяр ва маса суьрсет неинки Дагъустанда, гьакIни Россиядин центральный шегьерра, маса регионрани машгьур я.
«Лезги газет»
