Кура-кура шей маса гудай “Магнит” сетди 1-июлдиз Махачкъалада кIвалахдин азад чкайрин ярмарка кьиле тухуда. Агьалийривай кIвалахдин азад чкайриз талукь делилар чириз, гьакIни компаниядин векилрихъ галаз гуьруьшмиш жез ва пешекар меслятар къачуз жеда.
Мярекат 1-июлдин йикъан сятдин 11-даз Дагъустандин государстводин университетдин экономикадин факультетдин майдандал кьиле фида. Азад чкайрин ярмаркадиз адан тешкилатчийри кIвалахиз кIанзавай вирибуруз, гьа жергедай яз студентриз ва вузар акьалтIарнавай жегьилриз атун теклифзава.
Мярекат, “Магнит” компаниядихъ галаз санал РД-дин зегьметдин ва яшайишдин рекьяй виликди финин министерстводи, гьакIни Дагъустандин государстводин университетди тешкилнава.
“Чна Дагъустанда сифтегьан туьквенар гьеле июлдин эвелрилай ачухун пландик кутунва. Вад йисан вахтунда чаз ина кIвалахдин тахминан 2000 чка арадал гъидай ният ава. Ида региондин зегьметдин базар виле акьадайвал мягькемарда. Ярмаркадал чна кIвалахдин азад чкайрин гьакъиндай тамам делилар гуда, туьквенра кIвалахунин шартIарикай ва мажибрикай суьгьбетда, меслятар гуда. “Магнит” дурумлудаказ кIвалахдалди таъминарзавай кархана я. Чна базардин шартIариз жаваб гудай мажибар вахт-вахтунда гузва. Идалайни гъейри, чна жуван цIийи вири къуллугъчийриз датIана чирвилер хкаждай мумкинвал яратмишзава. Республикада къурулуш активнидаказ еримлу жезвайди фикирда кьурла, къуллугъчийриз кIвалахдин рекьяй виликди фин патал хъсан мумкинвилер ачух жедайвал я”, — къейдзава “Магнит” сетдин Кавказдин округдин директорди.
Туьквенрин ва абур авай мулкарин кьадардал гьалтайла, “Магнит” компания уьлкведа сад лагьай чкадал ала.
«Лезги газет»
