Ахцегьрин юкьван образованидин 1-нумрадин мектеб акьалтIарнавай Шамил Палчаева урус чIалан ЕГЭ-дай 100 балл къазанмишна. Шамил амай аялрин арада гьамиша гьар са затIунин гъавурда гьатиз кIан хьуналди, кьетIен акьулдалди, къанажагъдалди тафаватлу тир. Чирвилер къачунин рекье ийизвай чалишмишвилери ва и кардиз еке итиж хьуни адаз мектеб къизилдин медалдалди акьалтIариз ва государстводин имтигьанрай виниз тир баллар къазанмишиз куьмекна.
“Виликдай заз акI авай хьи, гуя виридалайни четинди имтигьанриз гьазурвал акун я. Амма гьакъикъатди субутарна — акьалтIай четинвал нетижаяр гуьзлемишун я. Чна — хизандини, муаллимрини — баллар малум жедалди вахт рикIик еке теспачавал кваз гуьзлемишна. За хъсан нетижадик умуд кутунвай… 100 балл халисан савкьат хьана. За виридаз — хизандиз, муаллимриз гайи насигьатрай, гьевесламишунай ва, кьилинди — зи алакьунрихъ инанмишвал авунай рикIин сидкьидай чухсагъул лугьузва”, — вичиз хас тирвал, кIусни дамах гвачиз баян гузва хьанвай агалкьунриз гадади.
Шамилаз уьлкведин медицинадин вузрикай садак экечIдай ва вичин машгьур мукьва-кьилийрикай сад тир Къемер Адигуьзеловадин-Палчаевадин — медицинадин илимрин докторвилин дережа къазанмишай сад лагьай дагъви дишегьлидин тIварцIиз лайихлу жедай ният ава.
«Лезги газет»
