Алатай гьафтеда Хасавюртда, Гь.Гьамидован тIварунихъ галай спортдин дворецда, азаддаказ кьуршахар кьунай 18 йисалди яшара авайбурун арада Дагъустандин кIвенкIвечивал къазанмишун патал заланвилин 11 категориядай 500-далай виниз спортсменри гьасиррал чпин устадвал къалурна.
Виридалайни еке заланвал авайбурун арада вичин ери-бине Кьурагь райондай тир Рагьман Малагьмедова (110 кг-дал къведалди) инанмишвилелди гъалибвал къазанмишна. Гила ада СКФО-дин кIвенкIвечивал патал акъажунриз гьазурвал аквазва.
Рагьман азаддаказ кьуршахар кьунал машгъул жез са йис я. Икьван чIавалди ада какахьай единоборствойрай вичин къуватар ахтармишна. Рагьманан 15 йис я, ада Махачкъалада автодорожный техникумдин 1-курсуна кIелзава. Олимпиададин резервдин спортдин школада (СШОР-3) вичин устадвал хкажзава.
Къуй чи вири ватандашрихъ гележегда мадни еке агалкьунар хьурай!
«Лезги газет»
