Тамам са гьафте идалай вилик Хорватиядин меркез Загреб шегьерда грекринни римлуйрин жуьреда кьуршахар кьунай кьиле фейи кесерлу турнирда лезги кьегьал хва, вичин ери-бине Хасавюрт райондин Къурушдилай тир Радик Къулиевани иштиракна. 87 кг-дал къведалди заланвал авайбурун арада Даниядай тир Турпала Бисултановахъ галаз кьиле фейи финалдин бягьсина ада инанмишвилелди гъалибвал къазанмишна.
РикIел хкин: чи ватандаш 2009-йисалай Белоруссияда яшамиш жезва. 2015-йисалай инихъ ада уьлкведин хкянавай командадик кваз международный турнирра иштиракзава. 2020-йисузни Радика (87 кг) Белоруссиядин чемпионвилин тIвар къазанмишнай.
Спортдин рекье бегьерлу камар ада 2017-йисузни къачунай: Франциядин меркезда кьуршахар кьунай кьиле фейи дуьньядин чемпионатда Радик Къулиева гимишдин медаль къазанмишнай. Гьа и йисуз ада Европадин чемпионатдани 2-чка кьунай. Алай йисан эвел кьиляй Белоруссиядин чемпионатда ада гимишдин медаль къазанмишна.
«Лезги газет»
