Дербентдин аялринни жаванрин яратмишунрин дворецда муаллимрин устадвилин “Дагъустандин йисан муаллим — 2023” конкурсдин муниципальный пай акьалтIарзавай мярекат шад гьалара кьиле фена.
Ана Дербент шегьердин кьил Рустамбег Пирмегьамедова, адан заместитель Видади Зейналова, шегьердин депутатрин собранидин председатель Гьасан Мирзоева, образованидин управленидин начальник Чимназ Алиевади, культурадин, жегьилрин сиясатдин ва спортдин рекьяй управленидин начальник Самиля Нажафовади, муаллимри ва масабуру иштиракна.
“Дагъустандин йисан муаллим — 2023” конкурсда гъалибчи лагьай тIвар къазанмишун патал гьар жуьре предметрай 17 муаллимдин арада акъажунар кьиле фена.
Са шумуд сятда давам хьайи конкурсдин нетижаяр ихьтинбур хьана: 1-чкадиз 12-нумрадин школадин ингилис чIалан муаллим Мадина Исаева, 2-чкадиз 3-нумрадин гимназиядин химиядин муаллим Мегьрибан Нажафова лайихлу хьана.
Пуд лагьай чка пуд муаллимдиз гана: 17-нумрадин школадин географиядин муаллим Диана Исрафиловадиз, 14-нумрадин мектебдин физикадин муаллим Жамиля Беговадиз ва 3-нумрадин школадин сифтегьан классрин муаллим Дилара Рагьимовадиз.
Гъалибчийризни приздин чкаяр кьурбуруз агалкьунар Гьасан Мирзоева, Чимназ Алиевади, шегьердин собранидин депутат Нариман Мусаева, образованидин работникрин профсоюздин председатель Вакъиф Хидирова мубаракна.
Мярекат кIватI хьанвайбуруз аялринни жаванрин яратмишунрин дворецда тербия къачузвайбуру концертдин программа къалуруналди акьалтIна.
Къагьриман Ибрагьимов
