Къе республикадин меркезда, Леваша районда ва маса чкайрани яргъал йисара КПСС-дин Дагъустандин обкомдин сад лагьай секретарвиле кIвалахай Мегьамед-Салам Ильясович Умаханов дидедиз хьайидалай инихъ виш йис тамам хьунин шад мярекатар кьиле тухузва.
Дугъриданни, Мегьамед-Салам Ильясовича Дагъларин уьлкведин экономика, культура, агьалийрин яшайиш вилик тухун патал еке зегьметар чIугуна.
М.-С.Умаханов 1918-йисан июндин вацра Леваша райондин ЦIудахар хуьре лежбердин хизанда дидедиз хьана. Хуьруьн школа куьтягьайдалай гуьгъуьниз ада Дагъустандин балугърин промышленный техникум акьалтIарна. 1939-йисуз ам ВКП(б)-дин жергейриз гьахьна. Гьа са вахтунда Яру армиядин жергейриз фейи ам Белоруссиядин военный округда стрелокар — бомбардирар гьазурдай школада кIелунивни эгечIна.
Чирвилерихъ къаних, кар алакьдай, общественный уьмуьрда гьевеслувилелди иштиракзавай жегьил гьам чкадин ва гьам республикадин вилик-кьилик квай инсанризни акуна. Адал жавабдарлу жуьреба-жуьре къуллугъар (ВЛКСМ-дин Махачкъаладин горкомдин секретарь, политический учебадин отделдин заведующий, ВЛКСМ-дин Дагъустандин обкомдин комсомолдин органриз регьбервал гудай отделдин заведующийдин заместитель) ихтибарна.
Ватандал фашистрин Германияди вегьейла Мегьамед-Салам Умаханов ватан хуьзвайбурун жергейрик экечIна. Дагъустанвиди къизгъин женгер кьиле физвай са шумуд фронтда отделенийриз, ротайриз регьбервал гана. Анжах 1948-йисуз ам полковникдин чинда аваз хайи макандиз хтана.
Уьлкведин шегьерар, хуьрер, промышленность, хуьруьн майишат кIвачел ахкьалдарзавай четин йисара М.-С.Умаханова ВКП(б)-дин Дагъустандин обкомдин военный, административный отделдин заведующийдин, Избербашдин округдин исполкомдин председателдин, ДАССР-дин кьезил ва недай-хъвадай промышленностдин министрдин, КПСС-дин Къарабудахкент райкомдин сад лагьай секретарвилин везифаяр кьилиз акъудна.
Фронтовик, комсомолдин, партийный башчи, зурба тешкилатчи ва общественный деятель республикадин гьар са агьалидиз ватандиз къуллугъ авунин ва намуслувилелди зегьмет чIугунин рекьяй чешне тир. Гьукуматдини ихьтин касдин баркаллу зегьметдиз, дяведин женгера къалурай викIегьвилериз лайихлу къимет гана. Мегьамед-Салам Ильясович Ленинан 4, Яру Гъед, Октябрдин Революциядин, Халкьарин Дуствилин, Ватандин дяведин I ва II дережайрин орденрин сагьиб тир. Ада вичелай гуьгъуьниз Дагъустандин халкьарин рикIера экуь гел туна.
Хийир Эмиров
