Галатун тийижир зегьметкеш, бажарагълу регьбер ва насигьатчи, къени ва камаллу инсан Гьажи Ражабович Жабраилован 85 йис тамам жезва. Алатай 2018-йис адан уьмуьрда кьетIенди хьана: адаз “Дагъустандин халкьдин игит” лагьай гьуьрметдин тIвар гана. Гьажи Ражабовичаз гьуьрметдин тIварар, грамотаяр, савкьатар лап гзаф ава. Абурукай зун рахазвач. Къенин суьгьбет за куьруь къейдинилай башламишда.
Жабраилов Гьажи Ражабович 1934-йисан 12-декабрдиз Кьурагь райондин Гелхенрин хуьре дидедиз хьана. Ана 7-класс акьалтIарайдалай гуьгъуьниз ада Кьурагьа школа-интернатда кIелун давамарна.
1952-1954-йисара лезги хци Литвадин Кибартай шегьерда Советрин Армиядин жергейра къуллугъна. Пуд йисалай хтайла, Гьажи кьил хуьдай рекьер жагъуруниз мажбур хьана. Ам Баку шегьерда гимияр ремонтдай заводда электриквиле кIвалахал кьабулна. Образование, дерин чирвилер авачиз уьмуьр тухун четин жедайди гьиссай ам Бакуда кардик квай Одессадин филиалда инженерар гьазурдай училищедиз гьахьзава. Гуьгъуьнлай ада Одесса шегьерда и училищеда кIелун давамарзава, кьуд йисалай, ам акьалтIарна, “инженер-электрик” пешекарвал къачузва.
1960-йисуз Гьажи Жабраилова вичин зегьметдин рехъ меркезда “Дагэнергода” башламишна. Гугъуьнлай Дербентда кардик квай 88-нумрадин мехколоннадиз управленидин начальниквилин къуллугъдал рекье твазва. Тапшурмишай кIвалах михьивилелди, гьакъисагъвилелди кьиле тухузвай адал къвердавай чIехи ва жавабдар къуллугъар ихтибарзава. Адан регьбервилин, тешкилатчивилин бажарагъ лагьайтIа, къвердавай хкаж жезвай. Ина кIвалахай 7 йисан къене ада 14 районни 5 шегьер электричестводалди таъминарна.
1982-йисалай къенин йикъалди Гьажи Жабраилова Дербент шегьерда кардик квай ДСК-диз (кIвалер эцигдай идарадиз) регьбервал гузва. Гуьгъуьнлай ам “Дагюгстрой” ОАО-диз элкъуьрна. Гьажи Ражабовича регьбервал гузвай тамам 37 йисуз Дербентда, Избербашда, Огнида, Махачкъалада ва Каспийскда эцигнавай бетондин чIехи панелрин квартирайрин кьадар лап гзаф я. Кар ана ава хьи, а квартираяр къачур агьалийрин патай садрани са арза, са наразивални хьанач.
1987-йисалай инихъ эцигунардай идаради Дербент шегьерда агьалийриз яшамиш жедай гзаф мертебайрин кIвалерикай ибарат кьуд микрорайон арадал атанва. Идалайни гъейри, гьам Дербентда, гьам маса шегьерра, хуьрера эцигзавай хсуси кIвалерни “Дагюгстройди” гьазурзавай панелринбур я.
Гьажи Жабраиловакай суьгьбет фидайла, адан мергьяматлувилин кIвалахрикайни талгьана жедач. Ада кIвалахзавай девирда куьмек кIанз атанвай кьван инсанрин кьадар лугьуз жедач, гьикI хьи, абурун сан лап гзаф я. Ада куьмек тагана, элкъвена хъфей са касни хьанач лагьайтIа, чун гъалатI жедач. Адан къаюмвилик кваз Дербентда, Кьасумхуьрел, Кьурагьа мискIинар эцигунин кардани еке куьмекар гана. Дербент шегьердин мектебра, аялрин бахчайра, лезгийрин, гьакI маса миллетрин театррин дараматра ремонтдин кIвалахриз еке куьмекар гузва.
И жегьетдай Лезги театрдикай кьетIендиз рахаз жеда. Эцигунардай идарадиз регьбервал гузвай 37 йисан девирда юлдаш Жабраилова Лезги театр датIана вичин къаюмвилик кваз хуьзва. Анин цIийи дарамат эцигна акьалтIарунин ва гьакI ам лезгийриз гунин кардани Гь.Жабраилован таъсир чIехиди хьана. Адаз ам вичин кIвал хьиз я. Ихьтин кьетIен багъривилин алакъаяр фикирда кьуна, чIехи гьуьрметдин лишан яз, Лезги театрдин регьберри Гьажи Ражабовичаз театрда кьуд лагьай жергеда 12-13 лагьай чкаяр уьмуьрлух яз чара авунва. Ам “Лезги газетдин” вафалу амадагрикайни сад я.
Къелемдин устадри, журналистри, адет яз, Гьажи Жабраилован анжах пешекарвилин, зегьметдин рекьикай кхьида. Къе заз адан хизандикайни кьве келима рахун хъсан аквазва. Адахъ пуд руш ава. Абурни чпин баркаллу буба хьтин къени, баркаллу крарин сагьибар, медицинадин хилен пешекарар я.
ЧIехи руш Оля Гьажиевнади эхиримжи цIуд йисуз Дербент шегьердин поликлиникадин заведующийвиле кIвалахна. Кьулан руш Инаят Гьажиевнади Каспийскда кардик квай вилерин азаррин клиникада кIвалахзава. ГъвечIи руш Эльмира Дербентда медицинадин колледждин директордин заместитель я. Гьажи Ражабович ругуд хтулди ва 8 птулди шадарзава. “Зи тIвар алай птул Гьажи заз иллаки ала я”, — дамахдивди лугьузва ада. Гьажи Ражабович кIубан я. Яргъал уьмуьрар хьурай ваз, гьуьрметлу кас!
Исамудин Агьмедов, “Вахтар ва инсанар” передачадин автор,
РГВК-да милли чIаларал кьиле физвай программайрин директор, Дагъустандин халкьдин артист
