Садра хкягъай кеспидай уьмуьрдин макьсад, руьгьдин таъминвал жагъун гьар са кас патал еке бахт я. Ахцегьрин аялрин музшколадин директор Рагьимов Абдулкерим Азизагъаевичазни вичин уьмуьрдин макьсад кеспидай аквазва. Машгьур манидарар, ашукьар, актерар, композиторар, музыкантар акъатнавай Ахцегьрин хуьряй тир ада вичин вири къанажагълу уьмуьр хайи халкьдин культура, музыка пропаганда авуниз, чи аялрик ам кIан хьунин гьиссер кутуниз серфзава. ГъвечIи чIавалай музыкадал, манийрал, кьуьлерал рикI алай гадади гьеле Ахцегьрин 2-нумрадин юкьван школада кIелзавай чIавалай, музшколадик экечIна, халкьдин милли алатрай чирвилер къачунай. 1978-йисуз хъсан къиметралди школа куьтягьайдалай гуьгъуьниз ам Дербент шегьердин музучилищедик экечIна. 1981-йисалай жегьил пешекарди Ахцегьрин школада муаллимвиле кIвалахиз башламишна. 1986-1988-йисара ада Ростовский областдин Семилянск шегьердин культурадин дворецдин директорвиле кIвалахна. Гьа са вахтунда Ростовдин госпединститутда музкультпросветдин отделение акьалтIарна.
КIвалахзавай ва кIелзавай йисара Ростовский областдин губернатордин, Россиядин халкьдин культурадин милли адетар хуьнай Саратов шегьердин мэрдин патай ва Вирироссиядин Волжский подворный фестивалда хъсандиз иштиракунай адаз гьуьрметдин грамотаяр ганай. Яргъал йисара везифайрив намуслудаказ, жавабдарвал аннамишуналди эгечIунай 2017-йисуз ам райадминистрациядин, гьакI РД-дин культурадин министерстводин патай “Дагъустандин культура вилик тухунин карда къазанмишай агалкьунрай”, “Шарвили” эпосдин суварин мярекатриз худколлектив гьазурунай гьуьрметдин грамотайризни лайихлу хьанай. РД-дин культурадин лайихлу работник тир ада 1994-1999-йисара Ахцегьрин РДК-дин директордин заместителвиле, 2002-2018-йисара райондин культурадин управленидин начальникдин заместителвиле кIвалахна. 2018-йисан апрелдилай адал Ахцегьрин Россиядин халкьдин артистка Рагьимат Гьажиевадин тIварунихъ галай музшколадин директорвилин везифаяр тапшурмишна… За адан вилик са шумуд суал эцигна.
- Абдулкерим Азизагъаевич, чаз куьне музшколадикай ва ана жезвай цIийивилерикай куьрелди суьгьбетна кIанзавай.
— Эцигай 1936-йисалай и дарамат капитальнидаказ ремонт авунвайди тушир. Инаг Советрин властди вахчур кьилдин касдин хсусият тир. Алай вахтунда 2 мертебадин дараматда (235 кв. метрдин майданра) 12 класс кардик ква. Хуьрерани 4 филиалди кIвалахзава. Анра 222 аялди кIелзава. Абуруз пешекарвилин образование авай 30 муаллимди фортепианодай, чIагъандай, аккордеондай, халкьдин милли алатрай (зуьрне, кфил, тар, далдам, кларнет) чирвилер гузва. 2018-йис школади хъсан нетижайралди акьалтIарна. Гзаф муаллимри ва чи тербиячийри райондин, гьакI республикадин дережада кьиле тухузвай мярекатра активвилелди иштиракна. Кьилди къачуртIа, М.Агьмедовадикай, Д.Алискеровадикай Махачкъалада кьиле фейи Г.Гьасанован тIварунихъ галай пианистрин конкурсдин дипломантар хьана. Чпин агалкьунар кардалди тестикьарун патал музшколадин аялрин яратмишунрин коллективди концертрин программаяр къалурна.
Са жерге ученикри райондин ва республикадин дережайрин конкурсра кIвенкIвечи чкаяр кьуна. ИкI, ФатIима ва Мегьамед Агьмедовар “Шалбуздагъдин макьамар ва ритмаяр” тIвар алай республикадин фольклордин фестивалда дипломриз лайихлу хьана. РФ-дин районрин музшколайрин арада фортепианодай тухвай республикадин конкурсда Заира Мусаевадиз РД-дин культурадин министр З.Бутаевадин къул алай Гьуьрметдин грамота гана. Чи 12 муаллимдикай ибарат халкьдин милли алатрин оркестрди алатай йисан апрелдиз Дербент шегьердин музучилищеда еке программадикай ибарат концерт гана. Анин директор К.Магьмудова чи школадин тIварунихъ чухсагъулдин чар рекье тунай. Алатай йисан декабрдиз Махачкъалада РД-дин культурадин министр З.Бутаевади, Ахцегьрин музшкола районрин музшколайрин арада лап хъсанбурукай сад тирди тестикьаруналди, 372 агъзур манатдин къимет авай пианино пишкешна.
Гьар йисуз РДК-дин тамашачийрин залда музшколадин муаллимрин оркестрдин ансамблди (руководитель — А.Гьамзатов) ва аялрин “Соколенок” дестеди (руководитель — Н.Мирзоев) гьахъ-гьисабдин концертар гузва. Аялар райондин ва республикадин дережайрин фестивалриз ва конкурсриз хъсандиз гьазурунай музшколадин дирекциядин патай муаллимар тир А.Агьмедовадиз, С.Велиевадиз, С.Агьмедоваз, Н.Мирзоеваз, А.Гьамзаеваз, тербиячияр тир Ф.Агьмедовадиз, М.Агьмедоваз, А.Хожаеваз, М.Мурадоваз ва масабуруз чухсагъул малумарна.
- КIвалахда гьихьтин четинвилер гьалтзава? Райадминистрациядин патай куьмек авани?
— Сад лагьайди, музалатар лап куьгьне хьанва. Гьавиляй муаллимри чпин хсусибур ишлемишзава. ЦIийибур къачун хиве кьунва. Кьвед лагьайди, музшколадихъ икьван чIавалди концертар ва маса программаяр кьиле тухун патал тамашачийрин зал, санузел, канализация авачир, тIебии газ ишлемишзавачир. Вири и татугайвилер арадай акъудун патал Ахцегь райондин кьил О.Абдулкеримова музшкола сифте нубатда газдин линиядик кутуна ва дарамат капитальнидаказ ремонтна: дегьлизар туькIуьр хъувуна, классрин ва кабинетрин вири ракIарарни пенжерар цIийибуралди эвезна, 2 класс цIийи хъувуна, хъвадай яд гъана, санузел ва канализация туькIуьрна. И кIвалахрилай гъейри, алай вахтунда (13 метр яргъивал ва 6 метрни гьяркьуьвал алай) тамашачийрин зал эцигиз башламишнава. Дуьшуьшдикай менфят къачуналди къе заз кьилди жуван, музшколадин муаллимрин ва ина чирвилер къачузвай аялрин патай “Ахцегь район” МР-дин кьил О.Абдулкеримоваз рикIин сидкьидай чухсагъул лугьуз кIанзава. Музшколадин педколлективди акьалтзавай несилриз искусстводин, ватанпересвилин тербия гунин карда гележегдани вири къуватар серфда.
- Къуй квехъ — музшколадин руководстводихъ ва адан коллективдихъ кIвалахда мадни еке агалкьунар хьурай!
— Сагърай куьнни!
Рагьидин Эминов
