Белгороддин областдал мукьвал-мукьвал Украинадин яракьлу къуватри гьужумар ийизвайди фикирда кьуна, анай саки 9 агъзур аял уьлкведин маса регионриз акъуддай къарар кьабулнава. Аялар кьабулдай регионрин арада Дагъустанни ава. Идакай республикадин Кьил Сергей Меликова хабар гана.
«Чна уьмуьрдин четин гьалдиз аватнавайбуруз куьмек гун патал гзаф кIвалахар ийизва. Залзала хьайи чIавуз дагъустанвийри Туьркиядин, Сириядин агьалийриз куьмекар гана, Палестинадай катуниз мажбур хьайи агьалияр кьабулна. Луганскдин, Донецкдин, Запорожьедин областдин агьалиярни фикир тагана тунач. Къе чи куьмекдихъ Белгороддин область муьгьтеж я. Чун и кардиз рикIивай гьазурни хьана кIанда. Республикадиз къвезвайбур аялар я, абурув кьетIен жуьреда эгечIун важиблу я», — лагьана Сергей Меликова.
РД-дин Гьукуматдин Председателдин заместитель Муслим Телякавова хабар гайивал, Дагъустанди Белгороддин областдай 550 аял кьабулдайвал я. Абурун арада чпихъ диде-бубаяр галай, мектебдиз тефенвай бицIекарни ава. Министрдин гафаралди, мугьманар патал чкадал къулай вири шартIар тешкилнава, абур яшамиш жедай чкаярни тайинарнава.
Лагьана кIанда, Сергей Меликова Белгороддин областдай къвезвай аялар хъсан дережада аваз кьабулун патал жавабдар гьар са министерстводин регьбердиз буйругъар ганва. Республикада кардик квай мергьяматлувилин са шумуд фондунини чеб и карда куьмек гуз гьазур тирдакай малумарнава.
Мугьманар Дагъустанда гьикьван чIавалди амукьдатIа, гьелелиг малум туш. Гьавиляй республикадин кьилевайбуру аялар мектебра кIелуникай хкуд тавун патал и месэладин къайгъуни чIугвазва.
Гегьеншдиз РД-дин Кьилин сайтдай кIелиз жеда.
Чи мухбир
