И йикъара чи арадай культурадин хилен зегьметдин ветеран, ДАССР-дин культурадин лайихлу работник, Лезги писателрин Союздин член, сегьнедин бажарагълу устад, яратмишунрин жуьреба-жуьре конкурсрин лауреат, «Бубадин веси» ктабдин ва вишералди шиирринни публицистикадин эсеррин автор Гьемдуллагь Минетуллагьович Бабаев акъатна. Гъилевай йисан 7-декабрдиз адан 85 йис тамам жезвай.
Гьемдуллагь Бабаев 1939- йисан декабрдиз Ахцегь райондин дагълух Усуррин хуьре зегьметкеш чIехи хизанда дидедиз хьана. Ада Ахцегьа 7 йисан мектеб, Махачкъалада ПТУ ва Москвада халкьдин университетдин режиссёрвилин курсар куьтягьна, Ахцегь РДК-да артиствиле ва 1972-йисалай халкьдин театрдин режиссёрвиле кIвалахна.
Гьемдуллагь Бабаева милли искусство, литература, публицистика, драматургия вилик тухуникни вичин лайихлу пай кутуна. Жегьил чIавалай шиирар, гьикаяяр, макъалаяр, са актунин пьесаяр кхьизвай адан гзаф эсерар «Лезги газет», «ЦIийи дуьнья», «Кард», «Дуствал» газетризни журналриз акъатна. Гь.Бабаеван «Ватан Ахцегьар», «Яран сувар», «Шарвили», «СтIалви шаир Сулейман» шиирар ва масабур манийриз элкъвена. «Жавагьир гьахъ тир», «КьантIар авачир муьгьуьббат», «Ягъалмиш жемир», «Кьел тIуьрда яд хъвада», «Фурс гвай бег» ва са актунин маса пьесаяр Ахцегьрин халкьдин театрди сегьнеламишна, абур Дагъустандин халкьдин яратмишунин КIвали чапдай акъудна.
2020-йисуз Махачкъалада, «Мавел» чапханада, Гь.Бабаеван «Бубадин веси» ктаб акъатна. Ада гьакIни «Шарвили», «Хкягъай эсерар» ктабарни чапдиз гьазурзавай, гьайиф хьи, агакь хъувунач. Адан ирс несилри къайгъударвилелди хуьдайдал шак алач.
Чна, дериндай хажалат чIугунивди, Гьемдуллагь Бабаеван хизандиз, вири багърийриз башсагълугъвал гузва. Адан экуь къамат чи рикIера амукьда.
«Лезги газет» ва «ЦIийи дуьнья» газетрин редакцийрин коллективар
