Дуьньяда, кьилди-кьилди уьлквейра, шегьерра, хуьрера хьиз, чна кIвалахзавай чкайра, зегьметдин коллективрани жуьреба-жуьре агьвалатар, дуьшуьшарни жеда. Хъуьруьн акатдайбурни.
Им Дербент шегьердин газетдин редакцияда хьайи кар я. Са акьван чIехиди тушир чи коллективда захъ галаз санал, зун заведующий тир отделда корреспондентвиле Дмитрий Григорьевич Воскобойник лугьудай яшлу касдини кIвалахзавай.
Кар анал ала хьи, вичин хсуси кIвалихъ сални галай ам иллаки гатун вахтунда мукьвал-мукьвал кIвалахдал геж къведай. Заз малум тирвал, себебни экуьн кьиляй салаз, анин са пай кьунвай марвардин цуькверизни яд гун тир.
За са акьван фикир гузвачиртIани, газетдин редактор Екатерина Гавриловна Головинадиз и кар хуш тушир. ГьикI хьи, редакцияда гьафтеда садра жезвай летучкайрикайни а кас ара-бир хкатдай.
Эверна са юкъуз заз вичин кабинетдиз редакторди.
— Ви отделдин корреспондент тирвиляй вуна Воскобойник тагькимарна, гьатта партийный рекьяйни (зун редакциядин парторганизациядин секретарни тир) адаз туьнбуьгьна кIанда, — буйругъна заз чIехида.
— Заз Дмитрий Григорьевич жуван патай тагькимарун са акьван кутугнаваз аквазвач, Екатерина Гавриловна, — жаваб гана за.
— Вучиз? — хабар кьуна редакторди.
— Сад лагьайди, ам залай яшариз хейлин чIехи я. Кьвед лагьайди, ам дяведин ветеран я.
— Хъсан. АкI ятIа, пакагьан летучкадал за ам жува вижеваз тагькимарда!
Хьана пака. И сефердани летучкадал геж хьана Воскобойник.
Газетдикай ихтилат башламиш хьайи са арадилай, рак гатана, “Хийирар, юлдашар”, лагьана, чун вири авай кабинетдиз гьахьна Воскобойник ва вичин гъиле авай марваррин чIехи кIунчI редактордин столдал эцигна. Редактор мягьтел хьана.
— Им вуч лагьай чIал я, Дмитрий Григорьевич, къе я 8-Март туш, я зун хайи югъ?!
— Это в порядке подхалимажа, товарищ начальник, — хъуьрез-хъуьрез, дамахдалди жаваб гана Воскобойника.
— Гила жува лагь, и касдиз вучдатIа, Нариман Алибегович! — пIузаррал мили хъвер алаз, гагь цуьквериз, гагь заз, гагь Дмитрий Григорьевичаз килигиз амукьна редактор.
Аку садра, цуькверихъни инсандин, иллаки дишегьлидин, рикI хъуьтуьлардай, ажугълувал тIимилардай гьикьван къуват аватIа! фикирна за жува-жувакди…
Нариман Къарибов
