Омар Аюбован — 95 йис
2016-йисуз “Дагъустандин композиторар” кIватIал туькIуьрдай вахтунда зун, бязибурукай делилар жагъин тийиз, четинвиле гьатнай. Гена гзаф ксарикай куьмек хьанай. Заз а кIватIал чапдай акъатунин карда куьмек гайи ксариз ва чи багъри “Лезги газетдин” редакциядин коллективдизни чухсагъул лугьуз кIанзава.
Зи кIватIалда 37 композитордин уьмуьрдин ва яратмишунрин рекьикай делилар гьатнава. Абурун жергедай сад тир бажарагълу композитор, ДАССР-дин халкьдин артист Омар Абусалатович Аюбов дидедиз хьайидалай инихъ мукьвара 95 йис тамам хьанва.
Омар Аюбов 1925-йисан 24-февралдиз Къусар райондин Легер хуьре дидедиз хьана. Аял чIавалай адан рикI музыкадал алай. ЦIусад йис тамам хьайила, Омара вичиз тар ягъиз чирна.
1951-йисуз О.Аюбов Махачкъалада П.Чайковскийдин тIварунихъ галай музучилищедиз (1965-йисалай ам Готфрид Гьасанован тIварунихъ гала) гьахьзава. Ина ада тардин классдай Х.М. Ханукаеван гъилик чирвилер къачузва. 1955-йисуз училище лап хъсан къиметралди акьалтIарзава. Гьеле студент тир вахтунда, 1954-йисуз, Омар Абусалатович Дагъустандин манийрин ва кьуьлерин ансамблдиз ва Даградиокомитетдин халкьдин музыкадин алатрин оркестрдиз тарчивиле кIвалахал кьабулна.
1960-йисуз композиторди Москвада кьиле фейи Дагъустандин литературадин ва искусстводин декадада иштиракна. Ада училищеда тарсарни гуз хьана. Ана кIвалахай йисара О.Аюбован гъиликай цIудралди бажарагълу музыкантар, манидарар, композиторар хкатна.
Композитордин манийрин арадай чавай Шагь-Эмир Мурадован чIалариз кхьенвай “Гьикьван хъсан я”, “Индиядин руш”, Алирза Саидован чIалариз кхьенвай “Вучиз?”, “Фатима”, “Доярка Жейран”, “НуькIер базар”, Сажидин Саидгьасанован чIалариз кхьенвай “Вун накь вучиз атаначир?” ва гзаф масабурун тIварар кьаз жеда. А манияр искусстводин халис жавагьирриз элкъвенва. Абур Р.Агъабалаева, Б.Эльмурзаевади, Р.Гьажиевади, Р.Максумовади, Гь.Аллагьвердиевади ва гзаф маса бажарагълу манидарри тамамариз хьана.
Бажарагълу композитор “ДАССР-дин лайихлу артист” (1960-йис), “ДАССР-дин халкьдин артист” (1970-йис) лагьай гьуьрметдин тIварариз ва гзаф грамотайриз лайихлу хьана.
Омар Аюбов 2005-йисан 6-мартдиз 80 йисан яшда аваз чи арадай акъатна. Амма адан гуьзел манийри къенин юкъузни чи рикIер шадарзава.
Эдуард Ашурагъаев,
муаллим
