Украинада кьиле тухузвай военный махсус серенжемдин иштиракчийрикай цIуд лагьай дагъустанвидиз Россиядин Федерациядин Игитвилин тIвар ганва. Ам Рутул райондин Хъуьлуьдрин хуьряй тир Мегьамеджанов Мегьамедали Камилович я. Идан гьакъиндай Россиядин Президент Владимир Путина Указдал къул чIугуна. Игитвилин баркаллу тIвар, гьайиф хьи, телеф хьайидалай кьулухъ гана.
И месэладикай Дагъустан Республикадин Кьил Сергей Меликова вичин телеграм-каналда ихтилатзава.
«Гьар са дагъустанвиди хьиз, зани чи ватанэгьлийри чеб викIегьдаказ тухунал дамахзава. Абур жуьрэтлувилин жигьетдай виридаз чешне я. Чандиз зиян хкатдайди чиз-чиз, абуру лап хаталу тапшуругъар кьилиз акъудзава. Баркалладин тIвар патал ваъ, вичин буржидиз, Ватандиз вафалувал къалуруналди.
Чи лайихлу офицердикай, адан женгерин тежрибадикай, инсанвилин ерийрикай за виликдайни ихтилат авурди я. Ам инсанрихъ галаз хуш рафтарвал ийиз алакьдай кас тир. Ам эхиримжи сефердиз рекье хутаз, Дагъустандиз адахъ галаз къуллугъзавай хейлин юлдашар хтанай.
Мегьамедали Камиловича лайихлу уьмуьр тухвана. Рязандин гьавадинни десантдин кьилин училище акьалтIарна, гьуьлуьн пиядин кьушунра къуллугъна, Кеферпатан Кавказ патал лап четин йисара терроризмдихъ галаз женг чIугуна, вичин ватанэгьлийрин хатасузвал хуьн патал алахъна. Сириядани Мегьамеджанова вич кар алакьдай офицер яз къалурна. Махсус серенжемдив эгечIайлани, ам сифте йикъарилай гьана авай.
Дагъустанви халис ватанперес тир. Ада вичин гъилик квай аскерар инанмишвилелди женгерик кутазвай. Гьа са вахтунда абурун гьакъиндай бубавилин къайгъударвални ийизвай. Эхиримжи женгинани ада жегьил аскерар къутармишун патал вичин чан къурбандна. Мегьамедали Камилович лап хъсан командир тир. Ада гьуьлуьн пиядин кьушунар патал лайихлу аскерарни гьазурна. Чна гьамиша вичин чан Россиядин азадвал патал гайи жуьрэтлу, зирек, дирибаш офицер рикIел хуьда.
Заз полковникдин, Игитдин уьмуьрдин юлдашдиз, веледриз ва вири мукьва-кьилийриз рикIин сидкьидай мад сеферда башсагълугъвал гуз кIанзава. Россиядин Игитриз баркалла!», — кхьена Сергей Меликова.
РикIел хкин, М.Мегьамеджанован уьмуьрдин ва женгинин рекьикай Дашдемир Шерифалиева кхьенвай макъала «Лезги газетдин» алай йисан 11-нумрада чапнава.
Хийир Эмиров
