Залзалайрин къурбандар

Туьркиядани Сирияда хьайи залзалайрин нетижада санлай 41 агъзурдалай гзаф ксар кьена. 15-февралдин делилралди, Туьркияда кьейибурун кьадар 35 агъзурдалай алатнава, 130  агъзурда­лай гзаф ксариз хасаратвилер хьанва. ХарапIайра къекъуьнин, инсанар жагъурунин кIвалах давам жезва. Бязи чешмейри къейдзавайвал, залзалайрин къурбандрин кьадар виш агъзурдавни агакьун мумкин я. Малумарнавайвал, Туьркияда хара­пIай­­рикай 8 агъзурдалай виниз ксар къутармиш хъувунва.

“Новости” РИА-ди 15-февралдиз хабар гайивал, Россиядин къутармишдайбурунни жагъурдайбурун дестейри Туьркиядани Сирияда кIвалахар акьалтIарна ва абур ватандиз хтанва. Алай вахтунда чкIанвай чкайрал залан техникади кIвалахар давамарзава.

Къейд ийин, мусибатдин агьвалатрин нетижада зарар хьанвай мулкарин агьалийрив Россиядин регионрай гуманитарный куьмекар агакьзава.

Махсус серенжемдикай

РагъакIидай пата Рос­сия­диз акси санкцияр мадни артухардай серенжемар кьабулзава. НАТО-дин кьил Й.Столтенберга малумарнавайвал, альянсдиз Украинадиз яракьрин жигьетдай куьмек гудай ихтияр ава. Идакай “Новости” РИА-ди хабар гузва.

Гьа са вахтунда ада НАТО ва адан членар къалмакъалрин иштиракчияр туш лугьузва.  Гуя “Украинадиз чпи чеб хуьн патал куьмекзава”. Гила НАТО Украинадиз танкар ракъурдай икьрардал атанва.

РФ-дин къецепатан крарин министр С.Лаврова идалай вилик малумарнай хьи, Украина патал ракъурзавай яракьрин гьар са пар Россиядин Яракьлу Къуватар патал къанундалди тергдай макь­саддиз элкъведа. Къейд авурвал, США-дини НАТО-ди Укра­и­надин къалмакъалда ачухдаказ иштиракзава — яракьар ракъу­рунилай гъейри, Великобританиядин, Германиядин, Италиядин ва маса уьлквейрин мулкара аскерар женгериз гьазурзава.

РФ-дин оборонадин министерстводи 14-февралдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 385 самолет ва 208  вертолет, зенитный ракетайрин 404 комплекс, пилот галачиз лув гудай 3121 аппарат, 7859 танк ва дяведин маса машинар, РСЗО-дин 1019 машин, артиллериядин ва маса 4091 яракь, воен­ный махсус 8377 автомашин тергна.

Гужлу ийидайвал я

Франциядин экономикадинни финансрин министрди Брюсселда кьиле фейи ЕС-дин экономикадинни финансрин Советдин заседанидал малумарнавайвал, Россиядиз акси яз кардик кутунвай санкцияр таъсирлубур я. Адан фикирдалди, сергьятви­ле­рин серенжемар мукьвал варцара мадни гужлу хъжеда. Адан гафар “Новости” РИА-ди раижнава.

РагъакIидай пата са шумуд йис идалай вилик Россиядиз акси яз кардик кутаз башламишай ва исятдани давамарзавай санкцийриз хъсандаказ дурум гузвайдакай чи уьлкведин гьу­кум­дарри са шумудра лагьана. Москвади малумарнава хьи, Рос­сия­ санкцийралди “шупIариз” кIан хьунин къастар кьилиз акъат таву­нин делил хиве кьун патал РагъакIидай патаз жуьрэтлувал бес жезвач. Гьатта РагъакIидай патан хейлин уьлквейра чи уьлкведиз­ акси санкцияр метлебсузбур ва нетижасузбур тирди къейднава.

Гъуьрчехъандал гьужумна

Хабаровскдин крайдин Нельма хуьруьн мулкара гъуьрчехъан­ пеленгди пад-падна. И хабар “Лента.ру” чешмеди ганва.

Итим пеленгди 8-февралдиз чакъвалай авунин нетижада кьена, амма и нагьакьан агьвалат 13-февралдиз дуьздал акъатна. Кьейиди Сахалиндин агьали тир. Хабаровскдин крайдиз ам тама гъуьрч авун патал фенвай. Алакъадиз эхкъечI тавурла, мукь­ва-кьилияр гъуьрчехъандихъ къекъвена.

Крайдин силисдин комитетдин управлениди малумарнавайвал, гъуьрчехъандин бедендин амукьаяр инсандивай физ тежедай хьтин четин чкайрай жагъун хъувуна. ГьакIни живедал ивидай­ хьанвай адан кIвачин къапар ва маса затIар алай.

ПIапIрусри зегьерламишна

Абакандин са мектебда кIелзавай пуд аял электронный пIапI­русар  чIугурдалай кьулухъ зегьерламиш хьана. “Новости” РИА-ди раижнавайвал, идакай Хакасиядин Роспотребнадзордин управлениди хабар ганва.

Чешмеди къейдзавайвал, тамам яшдив агакь тавунвай пуд жегьил никотин квай затIуни зегьерламишнава лагьай хабар Абакандин са мектебдай агакьна. Школьникри вейп ишлемишнавай. Алай вахтунда абурун сагъламвал азарханада духтуррин гуьзчивилик ква. Хасарат хьанвай жегьилри вейп патал жими затI жа­­гъурай чка хиве кьунвач. Хакасияда йисан эвел кьилелай электронный пIапIрусар чIугунин нагьакьан судурдихъ галаз алакъалу 5 дуьшуьш хьанва.

Гьазурайди — К.Ферзалиев