2021-йисуз чпин намуслу зегьметдалди, гьунарлу краралди экономикада, къуллугъдин дережайра, культурада, литературада, спортда, яшайишдин маса хилерани агалкьунар къазанмишай, чи халкьдин тIвар сейли авур вири рухвайризни рушариз баркалла, аферин!
ЦIийи агалкьунрин сагьибриз чна, абур гьина аватIани, редакциядин тIварунихъай чими саламар ва тебрикар рекье твазва.
* * *
Сергей Алимович Меликоваз — Да–гъустан Республикадин Кьилиз:
Хиве кьунва гьихьтин кьакьан дережа!
Такурай ваз рагъуларни гъерезар.
Республика вилик чIугу, регьбер хва!
Халкьдин патай къачу анжах эмбер, хва!
* * *
Сулейман Абусаидович Керимоваз — РФ-дин Федеральный Собранида Дагъустандин патай сенатордиз:
Губернатор, сенатор…
Куьгьне — цIийи тIварар я.
КIанзавайди девирдиз
Уьтквем цIийи крар я.
Ви къастуни таъсибдин
Тазвач чи руьгь кесибдиз.
* * *
Азим Ярагьмедоваз — Замбия уьлкведа РФ-дин Чрезвычайный ва Полномочный посолдиз:
Эй гьуьрметлу дипломат,
Ихтибарлу векил чи,
Дуьнья хьурай саламат,
Пакадин югъ тешкил чи!
* * *
Мурад Къазиеваз — РД-дин Гьукуматдин Председателдин заместителдиз:
Эмир бубад хтулди,
АтIудай хьиз чукIулдив,
Алудзава суалар
КьетIен хци акьулдив.
* * *
Ильман Алипулатоваз — РД-дин Халкьдин Собранидин депутатдиз:
Шак алач гьич, хва я вун!
Девирдин арха я вун!
Гъилни, рикIни ачухна,
Гьуьрметриз заха я вун.
* * *
Абдуллагь Гьабибоваз — РФ-дин лайихлу артистдиз — ХХ асирдин Гомеран руьгь, къамат хуьзвай устаддиз:
Валлагь, чи дуст, Гомеран
Руьгьди, рикIи эверай,
Вун чи цIийи устад я,
КIвачик ква ви гевгьерар!..
* * *
Агъамегьамед Хаметоваз — РФ-дин ва РД-дин лайихлу духтурдиз, таквадай душман тIугъвалдиз акси женгина башчидиз:
Диб чIур хьурай тIугъвалдин!
Акатрай вич маргъалдик!
Гьанай эхкъечI тежервал
Душмандивай яргъалди!
* * *
Агъахан Агъахановаз — “Дагъустандин халкьдин артист” лагьай чIехи тIварцIин сагьибдиз:
Хьанач жеди Кьеанрихъ
Фейи хва икI кьакьанрихъ!
Цавар чIехи хуьзвайд я
Гьакьван мягькем чукьванри!..
* * *
Алик Абдулгьамидоваз — журналистдиз, “Урусатдин къизилдин къелем” премиядин лауреатдиз:
Ви гьуьрметрин тIварарин
Гьисаб чидач, вучда бес?
Ватанперес крарин
Гьисаб кьун чаз хуш я бес!..
* * *
Альбина Аруховадиз — А.Тахо-Годидин тIварунихъ галай Педагогикадин илимдинни ахтармишунрин институтдин директордиз, “Дагъустан Республикадин вилик лайихлувилерай” ордендин сагьибдиз:
Школайрин илимдиз
Хце цIийи лувар на.
Гьа кар жеда несилриз
Багъишнавай сувар на.
* * *
Алюсет Азизхановаз — “Баркаллу зегьметдай” медалдин сагьибдиз:
Гъил агакьда куьмекдин
Ажузбурув, текбурув.
Вуч гаф ава дестекдиз,
Хуьзва ракъин экв хурув!
* * *
Асеф Шихмурадоваз — Дербентда ВИР-дин илимдин чIехи къуллугъчидиз, РД-дин илимдин лайихлу деятелдиз:
На кутазвай мярекат
Гьамиша я къуьлуьнди.
“Артух хьурай берекат!” —
Мурад я ви кьилинди!
* * *
Вакъиф Къужаеваз — Пензада кIвалахзавай гьунарлу мацави хциз, “РФ-дин тербиядинни марифатдин лайихлу къуллугъчи” тIварцIин сагьибдиз:
ТIвар хкажна Мацарин,
Нур артухна къацарин!
Генани рехъ тухузва
ЦIийи-цIийи аршарихъ…
* * *
Етара Мирзахановадиз — архитIви рушаз, ДГПУ-дин студентдиз, “Учитель будущего. Студенты” — Вирироссиядин студентрин конкурсдин гъалибчидиз:
Гележегдин муаллимвал
Гьихьтинди я? ГьикI жеда?
Ава чIехи лазимвал, —
Илимда ви рикI жеда!
* * *
Загьир Агъамоваз — “Зи проект — зи уьлкведиз!” — РФ-дин Общественный палатадин конкурсдин гъалибчидиз:
Хуьрерин чи сагъламвал
Я уьмуьрдин давамвал.
Гьахьняй чIехи уьлкведин
Ашукь хьанва алам вал!
* * *
Займудин Семедоваз — Куьгьне Къурушдилай ЦIийи Къурушдал кьван рехъ хъуьтIуьн цикIиз яхдиз муьтIуьгъарай хциз:
Вуч гаф ава къилихдиз!
Гъвелни жагъич синихдин!
Чукурун я сагъламвал —
Гьар игитдиз лайихди!..
* * *
Ислам Мегьамедоваз — “Дагъустан Республикадин вилик лайихлувилерай” ордендин сагьибдиз:
Къуллугъ ийиз паквилив,
Кутаз даим гьахъ вилик,
Мад барка хьуй рухвайрал,
Пайдах кьунвай гьахъвилин!
* * *
Къурбан Акимоваз — илимрин доктордиз, “Философия свободы” монографиядин сагьибдиз:
Фикиррани, хиялрани
Хьурай чи садвал.
Гьа кар жеда чаз виридан
Руьгьдин азадвал.
* * *
Къурбан Магьмудоваз — “Зардиян” ООО-дин магьсулдардиз, “РД-дин хуьруьн майишатдин лайихлу работникдиз”:
“Аран — мяден техилдин!” —
Аферин куь сихилдиз!
Фу къалин яз суфрадал,
Лув хьурай чи гуьгьуьлдик!
* * *
Мегьамед-Гьуьсейн Гьасановаз — Ахцегьрин РЭС-дин кьилиз:
Экв авачир кIвал тахьурай,
Рехъ авачир хвал тахьурай,
Мекьер, мичIер терс калтугиз,
КIвалера чи къал тахьурай.
* * *
Мегьарам Омароваз — Рязандин областда хуьруьн майишатдин зурба майишатдин кьилиз, девирдин меценатдиз, “Дагъустандин халкьдин Игит” тIварцIин сагьибдиз:
Гьихьтин кьетIен зегьметар —
Гьихьтин кьакьан гьуьрметар!
Ризкьи бул хьуй суфрайрин,
Къадирлу хьуй къиметар…
* * *
Мукаил Мукаиловаз — РФ-дин АПО-дин член-корреспондентдиз, РД-дин лайихлу муаллимдиз, “Гъепцегь-наме” ктабдин — монографиядин автордиз:
ИкI ашукь хьун тарихдал
Я халисан лайихвал!
ТIимил тахьуй несилрин
Чирвилерихъ къанихвал!
* * *
Нариман Гъазалиеваз — Москвада яшамиш жезвай карчи хциз, халкьдиз хийирлу гзаф крарин меценатдиз:
Жегьил цIийи къуватар
Артухариз чилел чи,
Гьайиф къвезвач такьатар,
Гимичи хьиз гьуьлел чи.
* * *
Нисрет Исмаиловаз — РФ-дин МЧС-дин полковникдиз, “Дагъустандин халкьдин Игит” ордендин сагьибдиз:
Гьикьван четин уламрай
ЭкъечIна вун, Игит хва!
Ифин хьана шаламрал,
Гьунар ийиз бажит, хва!
* * *
Рамазан Рамазановаз — Каспийскдин “Империал Строй” ООО-дин гендиректордин заместителдиз, “РФ-дин эцигунрин рекье лайихлувилерай” ордендин сагьибдиз:
Мертебадихъ — мертеба,
Мергьабадихъ — мергьаба!
Устадвилин дережа
Хуьз алахъа эртеба!
* * *
Римма Ферзилаевадиз — “Россиядин виридалайни хъсан духтур-лаборант” конкурсдин гъалибчидиз, Республикадин диагностикадин центрадин духтурдиз:
Кар тушни им дамахдай —
Халкь азардин къармахдай
Акъудзава, цIелхемар
Акъуддай хьиз чахмахдай!..
* * *
Россиядин Игит Зейнудин Батманован хизандиз — цIийи кIвалер мубарак:
Игитрин руьгь дири жеда эбеди,
Рухваяр мерд хуьзва халис дидеди!
Са хуьруьз ваъ, райондиз ваъ, — дидевал
Хуьзва куьне вири чIехи уьлкведиз!
* * *
Руслан Тагьирбеговаз — Махачкъаладин РОБ-дин аялрин отделенидин заведующийдиз, аялрин вилерин чапрасвал сагъар хъийидай цIийи къайда (методика) кардик кутур хирургдиз:
Хуьз вилерин хцивал,
Хуьз эллериз цицIивал,
Бахтар пайда бицIекриз,
Мецел алаз верцIивал!
* * *
Руслан Шагьмирзоеваз — РД-дин аграрный илимдин центрадин кар алай къуллугъчидиз, “РД-дин хуьруьн майишатдин лайихлу работник” тIварцIин сагьибдиз:
Берекатар — чилерал!
Къалинвал хьиз — гьуьлерал!
Са чIавузни кесибвал
Гьалт тавурай эллерал!
* * *
Рустам Саругълановаз — ЧIехи Петрдин тIварунихъ галай Военный академия акьалтIарнавай курхуьруьнви хциз — жегьил офицердиз:
Акъвазнава къуллугъда,
Цавар хуьз чи Ватандин.
Хкажна ви сагълугъдай
Сагъ бокалар лейсандин!
* * *
Саид Азизоваз — “Искусственный интеллектдай” Международный конкурсдин гъалибчидиз, Каспийскдин 2-СОШ-дин ученикдиз:
Машгьур я ви къанажагъ, —
КуькIвенва жед рикIе рагъ!
Акьул цIийи туькIуьрун
Тушни мегер бажарагъ!
* * *
“СтIалрин багълар” — цIийи ва лап чIехи инвестпроектдин сагьибриз:
Цуьк гъурай чи багълари
Дуьзенрани дагълара,
Инсаният гьейран жез
Чи ерийрал, чагъларал!..
* * *
Ухулвийриз — куьгьне хуьрел чан хкизвай кьегьалриз:
Рекьер физва Ухулиз,
Дагъдин лекьер машгъулиз.
Тахьурай куь еришар
Перт цифери рагъулиз.
* * *
“Фериде” ООО-дин устIарриз, “Мегьарамдхуьр-Ахцегь-Рутул” шегьре рехъ гегьеншариз, гьунаррал чан гъизвай устадриз:
Къулай хьурай шегьреяр,
Чи дагълара, дерейра!
Алакьунар устIаррин
Лап махарин жуьре я!
* * *
Шамил Мамедоваз — белижви хциз, азаддиз кьуршахар кьунай дуьньядин чемпиондиз:
Чилин вири гьасирар
МуьтIуьгъара асирра!
Ваз кутугай чIалар гваз,
Секин тахьуй шаирар!
* * *
Шамил Палчаеваз — Ахцегьрин 1-нумрадин СОШ-да урус чIалан ЕГЭ-дай 100 балл къачур кьегьалдиз:
100 балл, белки, тIимил я,
Мадни фирай вилик вун!
Илимдани Шамил яз,
Машгьур жеда — килиг вун!
* * *
Эльмар Яралиеваз — цицIигъви хциз, мергьяматлувилин “Инсан” фондунин векилдиз:
Ажузризни ялгъузриз
Ачухзава гъил куьне.
Гуя ичIи къумлухдал
Ачухзава гьуьл куьне!
* * *
Эльмира Къарахановадиз — Москвада Елена Образцовадин фондунин Международный конкурсдин гъалибчидиз:
Хордин чIехи маниди
Худ гуда жед гимидиз!
Ви сес, гьевес, устадвал
Даим хьурай чимиди!
* * *
Эмин Ибрагьимоваз — мискичви хциз, къуша путар гваз Эльбрусдал хкаж хьайи цIийи рекорддин сагьибдиз:
Акьван чIехи кукIушар
МуьтIуьгъарун лекьре хьиз!
Низ акурд я ви къаншар,
Кавказдин арш — чIере хьиз…
Суварин суфрадихъ мирзевал авур жувазни:
ЦIийи-цIийи дустариз
ЦIийи-цIийи тостарив
Шадар ая эллер чи,
Къакъажна хьиз гъилер чи!
Шараб тахьуй усалди
Къведай ЦIийи йисалди!
Мерд Али
