И йикъара Сочида “Вся Россия-2021” лишандик кваз уьлкведин СМИ-рин чIехи форум кьиле фена. Ана Дагъустандин информациядин ва печатдин министр Умаросман Гьажиев кьиле авай республикадин журналистрин дестедини иштиракна.
Форумдин сергьятра аваз 13-сентябрдиз, алай аямдин милли прессадин месэлайриз талукьарна, “Милли меденият ва чIал хуьнин карда милли прессади кьазвай чка” лишандик кваз элкъвей стол кьиле фена. Ам Дагъустандин журналистрин Союздихъ галаз санал РД-дин информациядин ва печатдин министерстводи тешкилна.
Мярекатда иштиракай гзафбуру эхиримжи йисара неинки са Дагъустанда, гьакIни уьлкведин амай регионрани газетрин, журналрин, иллаки хайи чIаларал акъатзавай изданийрин тиражар тIимил жезвайди къейдна. Иштиракчийри и кардин вилик пад кьунин, жегьилрин арада хайи чIалан, медениятдин кесер артухарунин, абур милли ивирриз мадни мукьва авунин жигьетдай чпин фикирар лагьана.
Умаросман Гьажиеван гафаралди, милли чIаларал акъатзавай газетрин кьадар тIимил хьунин кьилин себебрикай сад хайи чIалал пресса кIелзавай инсанрин кьадар тIимил хьунихъ галаз алакъалу я. Чи йикъара гзафбуру гегьеншдиз интернетдикай менфят къачузва. Ихьтин шартIара печатдин пресса — кьулухъ, электронный изданияр вилик акатзава. Элкъвей столдин иштиракчийри кIелзавайбурун кьадар артухарун патал хайи чIаларал акъатзавай изданийри интернетдани цIийи шартIара гегьеншдиз кIвалах тухвана кIанзавайди къейдна.
Лагьана кIанда, “Вся Россия-2021” форумдин сергьятра аваз РД-дин информациядин ва печатдин министр У.Гьажиеванни РФ-дин журналистрин Союздин председатель Владимир Соловьеван гуьруьш кьиле фена. Мумкинвиликай менфят къачуна, республикадин министерстводин кьили В.Соловьеваз Дагъустандин СМИ-рин мукьвара кьиле фидай форумдиз теклифна.
«Лезги газет»
