Мукьвара РД-дин Гьукуматдин Председателдин Сад лагьай заместитель Батыр Эмееван регьбервилик кваз республикада «Хатасуз ва еридин рекьер» милли проект кьилиз акъудунихъ галаз алакъалу месэлаяр веревирдна.
Кьиле тухузвай кIвалахрикай гегьеншдиз республикадин транспортдин ва рекьерин майишатдин министрдин везифаяр вахтуналди тамамарзавай Ширухан Гьажимурадова ихтилатна. Адан гафарай малум хьайивал, “Рекьерин хел” проектда къалурнавай мярекатар кьилиз акъудун патал 2 миллиардни 469 миллион манат пул чара авунва. И такьатрикай 1 миллиардни 280 миллион манат Махачкъаладиз талукь я. КIвалахар тамамарун патал проектда къейднавай 20 икьрардикай 19-дал къулар чIугунва. Вири мярекатар алай йисан эхирралди акьалтIарун лазим я.
Махачкъаладин мэр Салман Дадаева программадин куьмекдалди республикадин меркезда кьиле тухузвай кIвалахрикай суьгьбетна. Ада къейд авурвал, йисан эхирдалди Махачкъалада 96 куьчеда рекьер цIийикIа туьхкIуьр хъувуна акьалтIарда.
Совещанидин сергьятра аваз иштиракчияр “Зи Дагъустан — зи рекьер” проект кьилиз акъудзавай гьаларихъ галазни таниш хьана. Региондин и проектдиз, санлай къачурла, 1,4 млрд манат пул ахъайнава. Ш.Гьажимурадова хабар гайивал, адан сергьятра аваз 8 шегьердани 41 районда кIалахар кьиле тухузва. 17 муниципалитетда 65 объектдал кIвалахар тамамарна акьалтIарнава.
«Лезги газет»
