Алукьзавай 2026-йисуз Дагъустанда гарарин ва ракъинин энергия ишлемишунихъ элкъуьрнавай зурба кьве проект уьмуьрдиз кечирмишун — Новолакдин ВЭС ва Дербентдин СЭС эцигун патал 58 миллиард манат инвестицияр серфда. Идакай, «ЭкоЭнерджи» компаниядин гендиректор Артур Алибегован гафарал асаслу яз, «РБК ТВ Юг» агентстводи хабар гузва.
2026-йисуз Новолакдин гарарин (300 МВт) ва Дербентдин ракъинин (102 МВт) электростанцияр ишлемишиз башламишун пландик кутунва. Хабар гузвайвал, Новолакдин ВЭС эцигунин кIвалахриз — 52 миллиард манат, Дербентдин СЭС-диз 6 миллиард манат рекье тунва. Дербентдин ракъинин электростанция эцигунин проект ГПК консорциумди ва «ЦIийи энергия» компанияди кьилиз акъудзава. Кьве объектдални эцигунрин кIвалахар саки акьалтIарнава: гарарин гужлувал ишлемишдай тадаракар ва ракъинин модулар лазим тир чкайрал эцигнава.
ГьакIни республикада, Ногъай райондин мулкунал 60 МВт-дин гужлувал авай ракъинин электростанция эцигунин кIвалахар эхирдив агакьзава. Проект республикадин руководстводин куьмекдалди «Хевел» компанияди кьилиз акъудзава. Дагъустандин кьиблепата вацIарал са жерге гъвечIи ГЭС-арни эцигзава.
ИкI, алай йисан сентябрдиз Докъузпара райондин Кьавалар хуьруьн мулкунал Самурдин гъвечIи ГЭС-14 эцигиз башламишзавайдакай хабар ганай. Станциядихъ 1 МВт-дин гужлувал жеда. Проектдин планда къалурнавайвал, ГЭС-14 2026-йисан 31-декабрдиз ишлемишиз вахкуда.
ГьакIни, Ахцегь райондин Гутумрин хуьре 1 МВт-дин гужлувал жедай Самурдин МГЭС-12 эцигда. Санлай къачурла, чна идалай виликни хабар гайивал, Самур вацIун дереда, «ЭкоГЭС» технологиядал амал авуна (бандар ва цин гьамбарханаяр авачир къайдада), гъвечIи 6 ГЭС эцигда.
Алай вахтунда, малум хьайивал, 5 МВт-дин гужлувал авай цIийи жуьредин станцийрин проектарни гьазурзава. Санлай къачурла, республикада арадал хкиз жедай (ВИЭ), тIебиатдиз зарар тагудай жуьреда гьасилдай энергиядин проектриз къвердавай гзаф фикир гузва.
А. Алибегова хабар гайивал, электроэнергия гьасилунихъ элкъуьрнавай проектар уьмуьрдиз кечирмишунин рекье гьалтзавай четинвилерин арада тадаракар ва я абурун паяр маса къачудай рекьер дегиш хьун ава. ИкI, ГЭС-ар эцигун патал лазим тир ва виликдай къецепатан уьлквейрай гъизвай и шейэр маса къачудай маса чкаяр жагъуруниз, идахъ галаз алакъалу яз, сад-садан гуьгъуьна аваз туькIуьрнавай технологиядин цIиргъиниз цIийи кьилелай килиг хъувуниз мажбур хьанва.
Саида Мурадова
