22-ноябрдиз Дагъустандин гьукуматда “Хуьрерин мулкар комплекснидаказ вилик тухун” программа кьилиз акъудуниз талукь месэлаяр веревирдна. Къейд ийин, 2020-йисалай программадин сергьятра аваз чара авунвай пу­лу­нин такьатрихъ республикада 14 объект ишлемишиз вахкана, техникадин 7 уьлчме маса къачуна. Абурун арада СтIал Сулейманан районда­ эцигнавай мектеб, аялрин бахчаяр, район­рин поликлиникаяр патал медицинадин мобильный комплексар, тади куьмекдин улакьар ва масабур ава.

РД-дин Гьукуматдин Председатель Абдулмуслим Абдулмуслимова хабар гайивал, алай вахтунда программадин куьмекдалди республикада 2 мектебни аялрин са бахча эцигна акьал­тIар­зава.

Совещанидал программадин сер­гьятра аваз эцигнавай бязи объектар вахтунда ишле­мишиз вахкун тавун­вай­да­кайни рахана. Ихти­лат­ цин кьве объ­ектдикай физва. Малум хьайи­­вал, и кардин себеб эцигунар кьиле фи­­дайла рехъ ганвай бязи татугайвилер я. Пудратчи карханадин векилри кимивилер, энгел тавуна, арадай ахкъудун хиве кьунва.

Мярекатдин нетижаяр кьадайла, А.Абдулмуслимова программадихъ республика яшайишдин рекьяй вилик финин рекье авай важиблувал къейдна ва жавабдар вице-премьеррал программадин сергьятра аваз кьиле тухузвай кIвалахрал кьетIен гуьзчивал тухун тапшурмишна.

Чи мухбир