Дагъустан Республикада авай инсандин ихтияррин рекьяй Уполномоченныйдин Аппаратди хабар гузвайвал, 2022-йисан 1-июлдилай инвалидвал тайинардай цIийи къайдаяр къуватда гьатда. МСЭ (медико-социальная экспертиза) очнидаказ ва заочнидаказ — гьар са касди вичи хкягъайвал кьиле фидай мумкинвал ава.
1-июлдалди инвалидвал тайинарун патал вахтуналди тир къайда къуватда жеда: экспертизани заочнидаказ кьиле фида, пенсия ва кьезилвилер гьа авайвал давамарда.
1-июлдилай МСЭ гьикI кьиле фида?
Ам кьве жуьреда кьиле фида: очнидаказ, яни инсан и вахтунда вич авай чкада — интернатда, дустагъда, азарханада — МСЭ-дин бюродиз фида. Заочнидаказ лагьайтIа, инсан вич, адаз килигун ва ахтармишунар галачиз кьиле фида. И къайда патал анжах поликлиникади рекье тунвай медицинадин документар лазим жеда.
Бязи дуьшуьшра экспертиза анжах очнидаказ кьиле тухуда, заочнидаказ тир къайда хкядай мумкинвал авачиз. Мисал яз, эгер документрин якъинвал тайинариз жезвачтIа ва я махсус тадаракралди ахтармишунар кьиле тухунин лазимвал аватIа.
Гележегда вуч дегиш жеда?
2023-йисан 1-июндилай МСЭ арада мензил аваз (дистанционно) мад сеферда кьиле тухуз жеда. Идакай МСЭ-дин бюродин къарардихъ галаз рази туширбурувай ва адалай вине авай идарайриз арза гуз кIанзавайбурувай менфят къачуз жеда. Экспертиза мад сеферда кьиле тухун патал инсандивай вич яшамиш жезвай чкадин МСЭ-дин бюродиз физ жеда, ана адаз МСЭ-дин кьилин ва я федеральный дережадин пешекаррихъ галаз техникадин куьмекдалди алакъалу жедай мумкинвал гуда.
2024-йисан 1-январдилай экспертиза “тIварар алачир документрай” тайинарда, идан макьсадни ам жезмай кьван аслу туширди авун я. Къарар кьабулайдалай кьулухъ инсандикай делилар адаз ганвай группа ва реабилитациядин гьар са кас патал кьилдинди тир программа къалурнавай справкадал акъатда. Эгер инсан МСЭ-дин бюродин экспертизадихъ галаз рази туштIа, вич яшамиш жезвай чкадин МСЭ-дин бюродиз арза гуналди, ам экспертизада очнидаказ мад сеферда кьиле тухуз жеда.
Инвалидвилин группадикай справка Госкъуллугъриз ва я почтадиз хкведа. Заочнидаказ экспертиза кьиле тухудай чка дуьшуьшдин къайдада хкяда.
«Лезги газет»
