Гьуьрметлу инсанрикай

Кьасумхуьрелай тир зегьметдин ве­те­ран, отставкада авай полициядин­ ­под­­полковник, республикадин муници­­пальный къуллугъдин лайихлу работник  Алик  Эрзиханович   Мурадханов  неинки СтIал Сулейманан районда, гьакI адалай яр­гъарани гзафбуруз фадлай хъсандиз таниш я.

И йикъара Алик Эрзихановича вичин 70-гатфар къаршиламишна. Юбилейдихъ галаз ала­къалу яз ам муниципалитетдин кьил Нариман Абдулмуталибова кьабулна. Лишанлу вакъиа мубарак авуналди, райондин кьили Алик Эрзихановичан лайихлувилер, инсанвилин ерияр, руководителвилин ва тешкилатчивилин алакьунар къейдна.

— Куьне, гьуьрметлу Алик Эрзиханович, жуьреба-жуьре чкайра, саки 10 йисуз гьа жигьетдай яз рай­ондин администрациядин кьилин заместителвилин жавабдар къуллугъдал намуслудаказ зегьмет чIугуна, райондин экономика мягькемаруник, вилик тухуник еке пай кутуна, — лагьана Нариман Абдулмуталибова. — Эхиримжи йисара Куьне райондин об­щественный уьмуьрда активвилелди ­иштиракзава, жегьилрин арада ватан­пересвилин тербиядин, насигьатчивилин еке кIвалах тухузва. Лугьуз жеда хьи, Куьн уьмуьрда баркаллу рехъ фенва, и рехъ давамарни ийизва. Юбилей мубаракрай ва Квехъ мягькем сагъламвал, хизанда хушбахтлувал хьурай, гьуьрметлу Алик Эрзиханович!

Гуьруьшдал Алик Эрзихановичаз тебрикдин, алхишдин келимаяр райондин общественый палатадин председатель Алимет Мейланова, райадминистрациядин кьилин 1-заместитель Лацис Оружева, заместитель Абуталиб Фатулаева, райадминистрациядин крар идара ийизвайди тир Рамазан Абдулазизовани лагьана.

Эхирдай Нариман Абдулмуталибова Алик Мурадхановав Гьуьрметдин грамота вахкана.

Мярекатдилай гуьгъуьниз зун Алик Эрзихановичахъ галаз гуьруьшмиш хьана, адавай вичин уьмуьрдин ва зегьметдин рекьикай суьгьбет авун тIалабна.

Рагьметлу шаир Рамазан Каитовахъ ихьтин цIарар ава: “Инсанвилин муг авур кас къилихда, Уьмуьрда чка жедач адаз синихда”. И келимаяр Алик Мурадхановахъ галаз лап хъсандиз кьазва. Адак са касдивайни, гьич са куьналдини синих кутаз жедач. Ам гъвечIи чIавалай гьакI тербияламиш хьана: намус кваз, чIехиди-гъвечIиди чиз, гьар са касдиз гьуьрмет ийиз.

А.Э. Мурадханов 1952-йисан гатфарин гуьзел береда — апрелдин вацра — Кьасумхуьрел дидедиз хьана. 1-нумрадин юкьван школа ва Махачкъалада физкультурадин муаллимар гьазурдай курсар акьал­тIарна.

Вичи кIелай школада са йисуз физкультурадин муаллимвиле кIвалахай А.Мурадхановаз Советрин Армиядин жергейриз эвер гана. Вичин буржи ада ГДР-да авай Советрин кьушунрин дестеда, спортдин ротадин старшина яз, тамамарна. И йисара ада волейболдай, футболдай, азаддаказ кьуршахар кьунай хейлин турнирра вичин алакьунар къалурна.

Армияда запасдин офицерар гьазурдай курсарани кIелна, А.Мурадханов ватандиз младший лейтенантдин чинда аваз хтана.

Кьадар-кьисметди Алик Эрзиханович Къазахстандин Тургайдин областдин Жанадалинский райондиз акъудна. Са йисуз ана спортшколадин директорвиле кIва­ла­хай зирек лезги гададиз 1975-йисан майдин вацра къайдаяр хуьдай органриз кIва­ла­хал атун теклифна. РОВД-дин начальниквиле кIвалахзавай подполковник Мурад Жигерован теклифдалди А.Мурадханов райондин отделдин розыскдин инспектордин къуллугъдал кьабулна. Кьве йисни арадай фенач, вич хъсан пешекар, гьахъвал ва истемишунар гвай инспектор яз къалурай ам уголовный розыскдин начальниквилин къуллугъдал тайинарна.

А.Мурадханова  пешедин  рекьяй  вичин чирвилерин дережа хкажун кьетIна, ам 1977-йисуз Карагандада СССР-дин МВД-дин высший школадик экечIна, 1981-йисуз анаг хъсан чирвилер аваз акьал­тIарна.

1985-йисалай 1989-йисалди Махач­къа­лада уголовный розыскдин старший уполномоченныйвиле, 1989-йисалай 1994-йисалди Къа­захстандин МВД-дин Гурьевдин управленида Эмбинский райондин ОВД-да уголовный розыскдин ва  криминальный милициядин начальник­виле кIвалахна. Адаз подполковникдин чин гана.

— За кIвалахзавай Гурьевдин областдин Эмбинский районда “Тенгизнефтгаз” объединение кардик квай, — рикIел хкизва отставкада авай подполковникди. — Иниз СССР-дин саки ви­ри пипIерай вахтадин къайдада гьар вацра 45-50 агъзур кас къвез-хъфизвай. Абурулай гъейри, 5000-далай виниз венгерри, гзаф кьадар чехри, французри, финнри, ингилисрини кIвалахзавай. А чIавуз заз маса къуллугъчийрихъ галаз санал кьве сеферда Къазахстандин компартиядин ЦК-дин секретарь Нурсултан Назарбаевахъ галаз кьиле фейи гуьруьшда иштиракдай мумкинвални хьана.

Гьелбетда, диде-буба кIвале ялгъуз тирла, гъурбатда яшамиш хьун ва кIвала­хун регьят кар туш. И кар себеб яз, Алик Эрзиханович вичин хизанни галаз Дагъустандиз хтана.

1994-йисуз подполковник А.Мурад­ханов Махачкъалада уголовный ро­зыскдин управленидин наркотикрихъ галаз женг чIугвадай отделдин начальниквиле тайинарна. Жавабдар и везифаяр ада 1997-йисалди уьзягъдаказ кьилиз акъудна.

1997-йисалай 2008-йисан мартдин вацралди Алик Эрзихановича СтIал Сулейманан райондин администрациядин кьилин заместителвиле кIвалахна, район яшайишдин, экономикадин, культурадин ва маса рекьерай вилик финик еке пай кутуна.

Яргъал йисара къайдаяр хуьдай ор­ганра ва райондин администрацияда намуслудаказ кIвалахунай А.Мурадхановаз СССР-дин МВД-дин I, II ва III дере­жай­рин, “Россиядин МВД-дин 200 йис” медалар, “Милициядин отличник” знак, “Да­гъустан Республикадин муниципальный къуллугъдин лайихлу работник” лагьай гьуьрметдин тIвар ганва.

А.Мурадхановахъ галаз ихтилатар ийи­дайла, за кьатIана хьи, ам 70 йисан вахтунда фейи ва физвай рекьелай, вичин кьисметдилай рази я. Алик Эрзихано­вичаз юбилей мубарак авуналди, за жуван макъалани Низами Генжевидин цIа­раралди акьалтIарзава: “Лугьун жуваз: къадир жечни кьисметдин, Къужахдава вун бахтунин, гьуьрметдин”.

Хазран Кьасумов