26-майдиз Махачкъалада, Дагъустандин гуманитарный институтда, лезги халкьдин илимдин ва медениятдин деятелрин Ассоциациядин конференция кьиле фена. Мярекатда са жерге алимри, жемиятдин векилри, журналистри ва масабуру иштиракна.
Конференциядал рахайбуру Ассоциациядин тарихдикай, ада кьиле тухвай кIвалахрикай, алай вахтунда тешкилатдин вилик акъвазнавай месэлайрикай лагьана.
Гуьгъуьнлай сесер гуналди иштиракчийри Ассоциациядин регьбер хкяна: и везифаяр ДГИ-дин ректордин куьмекчи, экономикадин илимрин доктор Мугьаммад-Букар Нагъметулаевич Гьамидуллаевал ихтибарна.
М.-Б.Гьамидуллаев 1953-йисуз Докъузпара райондин Къаракуьре хуьре дидедиз хьана. Ам РФ-дин лайихлу машиностроитель, профессор, медико-технический илимрин академик я. 30 йисалай гзаф девирда алимди уьлкведин промышленностдин хиле зегьмет чIугуна, оборонадин чIехи карханайриз, илимдин идарайриз регьбервал гана.
М.-Б.Гьамидуллаеван къелемдикай 150-далай виниз илимдин кIвалахар, монографиярни ктабар хкатнава. Алимди Германияда, Италияда, Испанияда, Францияда вичин тежриба хкажна.
Вичин рахунра М.-Б.Гьамидуллаева къейд авурвал, Ассоциациядин кIвалах цIийи къайдада кардик кутадайвал я. Лезги халкьдин илимдин, медениятдин, спортдин, яшайишдин, образованидин ва маса хилериз кьетIен фикир гуда. Ассоциациядин членрин арадай гьар са хилез регьбервал гудай кьилдин ксар хкяда.
Мярекатдин эхирдай Мугьаммад-Букар Гьамидуллаева хабар гайивал, мукьвара тешкилатдин нубатдин заседание кьиле тухудайвал я. Анал Ассоциациядин кIвалахдиз талукь са жерге месэлаяр веревирдда.
Агьмед Магьмудов
