Вичин ери-бине Мегьарамдхуьруьн­ райондин Гилийрилай тир, алай вахтунда Красноярскда яшамиш жезвай чи ватанэгьли — аялар тежезвай­ дишегьлийринни итимрин мес­элай­рай кьил акъудзавай «Духтур Рена­тан клиника» медцентрадин кьилин­ духтур, медицинадин илимрин кандидат, «Россия — мумкинвилерин уьл­кве» чIехи проектдин сергьят­ра аваз кьиле тухвай «Россиядин баш­чияр» 3-сезондин «Здравоохра­не­ние» паюна гъалиб хьайи Ренат Къурбанисмаилов — лапароскопиядин операциядин куьмекдалди­ дишегьлийрин репродукциядин сагъ­ламвал гуьнгуьна хтунин къайда арадал гъунал машгъул я. Ам 2026-йисуз уьмуьрдиз кечирмишун пландик ква.

Ренат Къурбанисмаилова Красно­ярскда профессор В.Ф. Войно-Ясе­нец­кийдин тIварунихъ галай госмедуниверситет акьалтIарна. Регьбервал гунин тежриба гьа ина кIелзамаз къачуна. Сифте факультетдин, гуьгъуьнлайни медуниверситетдин студентрин советдин председателвилин везифаяр тамамарна. 2019-йисуз, 26 йисан яшда аваз, чи ватанэгьлиди медицинадин многопрофильный центрадиз регьбервал гана. 2022-йисалай Красноярскдин крайдин здравоохраненидин министерстводин патав тешкилнавай общественный советдин председателви­лин везифаяр тамамарзава. Гьа и йисуз ада «Духтур Ренатан клиника» мед­центр ачухна. Ана, чна винидихъни къейднавайвал, акушервилинни гинекологиядин патологийрай хьиз, урологиядин, андрологиядин ва эндокринологиядин азаррални махсусдаказ машгъул жезва — абурай кьил акъудзава ва сагъарзава.

Ренат Къурбанисмаилов 50-далай виниз публикацийрин автор я. Адахъ 3 патент ава. Ам гьакIни Россиядин медицинадин чIехи тешкилатрин советникни я. Дагъустандин медакадемияда ада проректор яз са йисуз кIвалахна.

Къенин юкъуз дишегьлидиз кIвачел залан жез манийвалзавай месэлайрикай садал (медицинадин диагноз — непроходимость маточных труб) машгъул хьуналди, Ренат Къурбанисмаилова цIийи къайда теклифзава. И диагноз авайла, аял хьун патал дишегьлиди ЭКО-дикай (экстракорпоральное оплодотворение) менфят къачун герек къвезва. Амма Ренат духтурди лапароскопиядин операциядин куьмекдалди «непроходимость» арадай акъудун, яни стент ишлемишуналди (стентирование), гуьтIуьзвай ва я тамамдаказ агал хьанвай дуьшуьшра манийвалзавай «рехъ» ачухарун теклифзава.

Гаф кватай чкадал лугьуз кIанзава хьи, Ренат Къурбанисмаилова медици­надин хиляй кьабулзавай серенжемрин­ нетижада репродукциядин рекьяй гьалар чIурузвай 1000-далай виниз ди­шегь­лийриз дидевилин бахт гьиссдай мумкинвал хьана, абуру сагълам бицIекар хана. Чи ватанэгьлиди тек­лифзавай къайда ЭКО-дин альтернатива я. Чна винидихъни къейднавайвал, лапараскопиядин операцияди неинки гуьзлемишзавай нетижадал — дишегьли кIвачел залан хьунал, гьакI дишегьлидин репродукциядин сагъламвал тамамдаказ сагъардай мумкинвални гузва. Гьаниз килигна, медицинадин башчидин планрик и жигьетдай ахтармишунар акьалтIарун ва и къайда уьлкведин медицинадин идарайра тамамдаказ менфят къачуз жедайвал уьмуьрдиз кечирмишун ква.

— Са сеферда зи патав кIвачел залан тежез 15 йис алатнавай дишегьли атана. Ам гзаф духтуррин патав фенвай, амма нетижа авачир.  Чна УЗИ аппаратдин куьмекдалди за теклифзавай къайдадай операция кьиле тухвана. Кьве вацралай дишегьли кIвачел залан хьана, 9 вацралай гъилиз сагълам бицIек атана, — суьгьбетзава Ренат Къурбанисмаилова.

Чаз мадни чир хьайивал, Ренат духтур «Дидевилин ва бубавилин бахтлувал» проектдални машгъул жезва. Адан сергьятра аваз жегьилриз хизанар кутунин ва аялар хунин месэлайрай гъавурдик кутунин кIвалах тухузва.

— Зун телевиденидин эфирда рахазва. Соцсетра захъ жуван чинар ава. Анра жаванар, жегьилар патал малуматар чапзава. За гьисабзавайвал, чна жаванар хизан, алакъаяр вуч ятIа гъавурда тун лазим я. Анжах икI инсандин кьатIунар дегишариз жеда. КIелдай чкайра лекцияр гзаф итижлудаказ кьиле физва, жегьилри чпин рикIик квай суалар гузва, абурув за дуьзгуьн жавабарни агакьарзава, — къейдзава ада.

«Россиядин башчияр» конкурсдиз Р. Къурбанисмаилова вичин алакьунар ахтармишун ва са фикирдал алай ксарихъ галаз гуьруьшмиш хьун патал арза вуганвай.

— Медицинадин сообщество патал­ мурадар, къастар-фикирар кьилиз акъа­тун (самореализация) гзаф важиб­лу я. Здравоохраненидин къурулуш да­тIана вилик физва. ЦIийи тегьерда кьатIунзавай, коллектив виликди тухудай регьберрихъ игьтияж жезва. «Россиядин башчияр» медицинадин къуллугъчияр патал жувакай хабар гудай хъсан мумкинвал я. Идалайни гъейри, конкурсдин сергьятра аваз, зун сад хьтин фикиррал алай ксарихъ галаз таниш хьана. Россиядин здравоохраненидин министр Михаил Альбертович Мурашкодихъ галаз са шумудра суьгьбетарна. Ам жегьил башчияр патал чешне къачуниз лайихлу кас я, — къейдзава Ренат Къурбанисмаилова.

РикIел хкин: уьлкведин Президентдин тапшуругъдалди «Россиядин башчияр» конкурс 2017-йисалай инихъ кьиле тухузва. Алатнавай вахтунда конкурсдиз Россиядай ва дуьньядин 150 уьлкведай миллиондилай виниз арзаяр рекье тунва.

Регина  Семедова