Дагъустан Республикадин вилик лайих­лувилерай, яргъал йисарин намуслу ва бегьерлу зегьметдай, общественный кра­ра активвилелди иштиракунай ва 80 йис тамам хьунихъ галаз алакъалу яз Кьасумхуьрелай тир Ягъибегов Ягъибег Рамазановичаз РД-дин Кьил Сергей Меликован указдалди «За доблестный труд» медаль гана. Шабагь Я. Ягъибеговав СтIал Сулейманан райондин кьил Саид Темирханова вахкана.

Ада Ягъибег Рамазановичаз шабагь Сергей Меликован, Гьукуматдин ва вичин патай мубаракна, юбилярдин уьмуьрдин ва зегьметдин рекьерикай, тухвай общест­венный кIвалахрикай ихтилатна, адан инсанвилин ерияр, лайихлувилер къейдна.

Ягъибег Рамазановичаз тебрикдин келимаяр гьакI райондин общественный палатадин председатель Алимет Мейланова­, райадминистрациядин кьилин заместителар тир Заур Къагьриманова, Абуталиб Фатулаева, Дагъустандин халкьдин шаир Майрудин Бабаханова ва масабуруни лагьана.

Адет яз, са кьадар рекьиз фейила, гьар са кас элкъвена кьулухъди килигда, фейи мензил, авур кIвалахар, алакьай крар веревирдда. Ингье, ери-бине Хутаргърин хуьряй тир Ягъибег Рамазановични уьмуьрда 80 йисан рекьиз фенва. Лугьуз жеда хьи, и рехъ баркалла алайди, хуьр-район патал аферин къведай крар авурди хьана.

Я. Ягъибегов 1945-йисан 20-августдиз Хутаргърин хуьре дидедиз хьана. Школа акьалтIарай жегьилди 1964-1967-йисара  Со­ветрин Армиядин жергейра къуллугъна. 1979-йисуз Махачкъалада Дагъустандин политехнический техникум акьалтIарай пешекарди вичин зегьметдин рехъ Кьасумхуьруьн консервиярдай заводда бригадирвилелай башламишна. Ягъибег Рамазановича ви­чин уьмуьрдин цIусад йис республикадин кIвенкIвечи карханайрин жергеда хьайи Кьасумхуьруьн консервиярдай заводдихъ галаз алакъалу авуна. Ахпа технологвиле ва 1978-1980-йисара заводдин цехдин начальниквиле кIвалахна.

— Кьасумхуьруьн консервиярдай заводди неинки чи республикадин, гьакIни Совет­рин Союздин гзаф маса шегьерар, гьабурукай яз, Москва, Ленинград хъсан еридин про­дукциядалди таъминарзавай, — суьгьбетзава Ягъибег Рамазановича. — КIва­лах­­да агалкьунрай заводдиз 14 сеферда­ РСФСР-дин ва 12 сеферда СССР-дин гъи­ляй-гъилиз къведай Яру пайдахар ганай. И агалкьунрик жуван ва жув кьиле аваз хьайи комсомолринни жегьилрин сменадин ва консервиярдай цехдин пайни хьунал за дамахзава.

Я. Ягъибегова заводдин комсомолрин организациядизни саки 10 йисуз регьбервал гана. Заводдин консервиярдай цехда 1970-1976-йисара комсомолринни жегьилрин смена тешкилна, ана 70 касди кIва­лах­за­вай­. Сменадин начальниквиле Ягъи­бег Рамазанович тайинарна. Са сменада абуру 120-140 агъзур шартIунин банка консервияр акъудзавай. Сезондин вахтунда абурун кьадар мадни гзаф тир.

1980-йисуз, кIвалахдин нетижайриз килигна, КПСС-дин райкомдин бюродин къарардалди Ягъибег Рамазанович «Рычал-су» заводдин директорвиле тайинарна. Ана кIвалахай кьуд йисан къене завод неинки районда, гьакIни республикада кIвенкIвечи карханайрин жергеда хьана.

1984-2001-йисара Я. Ягъибегова райондин ХООП-дин директорвиле кIвалахна, и хелни вилик тухвана, агалкьунар къазанмишна.

Перестройкадин ва гуьгъуьнин йисара производстводин гзаф хилера, гьабурукай яз хуьруьн майишатдани гьалар четин хьана, гзаф карханаяр, совхозар чкIидай гьалдиз атана. Абурун арада са вахтара республикада кIвенкIвечийрин жергеда авай, Дагъустандин обкомдин, Верховный Советдин ва Министррин Советдин гъиляй-гъилиз къведай Яру пайдахдиз лайихлу хьайи «Аламишинский» совхозни авай. Ана директорар дегиш жезвай, гьалар къайдадик акат хъийизвачир. И чIуру гьал акур хуьруьн жемятди Я. Ягъибеговавай совхоздин директорвилиз хтун, чкIизвай майишат­дин кьиле акъвазун тIалабна. Хайи хуьруьхъ, райондихъ рикI кузвай касди жемятдиз «ваъ» лагьанач.

Совхоздин директорвиле кIвалахзавай йисара къазанмишай агалкьунрай Я. Ягъи­беговаз «Дагъустан Республикадин хуьруьн майишатдин лайихлу работник» лагьай гьуьрметдин тIвар гана. Райондин промышленностдин ва хуьруьн майишатдин хилера яргъал йисара кIвалах авунин нетижа яз Я. Ягъибегов 1978-1984-йисара Кьасумхуьруьн Советдин, 1998-2002-йисара райондин Советдин депутатвиле, райондин Соб­ранидин председателдин заместителвиле хкяна.

Дурумлу зегьметдай ганвай шабагьар, къиметлу пишкешар Ягъибег Рамазановичахъ гзаф ава. Абурукай яз, чавай «РСФСР-дин недай-хъвадай шейэрин промышленностдин отличник»», «РФ-дин потребкоопе­рациядин отличник», «Дагъустандин хуьруьн майишатдин лайихлу работник» тIва­ра­рин, РСФСР-дин Верховный Советдин Президиумдин, ВЛКСМ-дин ЦК-дин, Да­гъус­­тан Республикадин, райондин админист­рациядин гьуьрметдин грамотайрин, «Бегьерлу зегьметдай», «ЧIехи Октябрдин социалистический революциядин 100 йис», «Зегьметдин ветеран» медалрин, РСФСР-дин недай-хъвадай промышленностдин министрдин тIвар кхьенвай къизилдин сятинин тIварар кьаз жеда.

Яшар хьанва, кIвалахда къазанмишай агалкьунар ава лагьана, Я. Ягъибегов секиндиз кIвале ацукьнавач. Акъвазай цихъ ни агалтда, кIвалахдик квачир мишер муьрхъуь кьада гафар тикрардай Ягъибег Рамазанович гьамиша гьерекатда авай, къай­гъуйрик квай кас я. Гьеле школада ва техни­кумда кIелдай йисара спортдал машгъул хьайи ада гилани и рехъ давамарзава, сагълам уьмуьр кечирмишзава.

Ам гьакI райондин общественный палатадин председателдин ва ТИК-дин кьилин заместитель я.

Уьмуьрда фейи рекьин мензилар­ хьиз, вуна атIун хъийидай рекьер-мен­зиларни бе­­гьерлубур, баркалла алайбур хьурай, гьуьрметлу Ягъибег Ра­ма­занович!

Хазран Кьасумов