1-сентябрдиз Хасаюрт райондин ЦIийи Къурушрин хуьруьн уьмуьрда лишанлу вакъиа кьиле фена: ина фадлай чкадин жемятди вилив хуьзвай аялрин бахча ачухна.
200 аял кьабулдай шартIар тешкилнавай «Нур» тIвар алай аялрин бахча ачухуниз талукьарнавай мярекатда РД-дин Гьукуматдин Председателдин заместитель Рамазан Жафарова, Хасавюрт райондин кьил Арсланбег Алибегова, РД-дин рекъемрин рекьяй вилик финин министр Юрий Гьамзатова, РД-дин Халкьдин Собранидин комитетдин председателдин заместитель Руслан Ибрагьимова ва масабуру иштиракна.
Объект милли «Демография» проектдин сергьятра аваз эцигнава. Бахча герек тир вири затIаралди тамамдиз таъминарнава, гьаятда аялар къугъвадай махсус майданни кардик кутунва.
Рамазан Жафарова къурушвийриз хуьре яшайишдин рекьяй еке метлеб авай объект ачухун мубаракна ва «Демография» программадин куьмекдалди регионда аялрин цIийи бахчайрин кьадар артух хьайиди къейдна.
И макъаладихъ галай шикилдин куьмекдалди, «SilicaAR» приложение кутуна, цIийи бахча ачухуникай гьазурнавай видеодиз килигиз жеда.
Чи мухбир
