РФ-дин Гьукуматдин Председатель М. Мишустинан буйругъдалди СтIал Сулейманан райондин мулкарал арадал атанвай хуьруьз «ЦIийи Испик» тIвар ганва. Ам Испикрин хуьряй са пай агьалияр куьч хьунин нетижада 1966-йисуз арадал атана.
Хуьруьн агьалийрин, райондин кьил Саид Темирханован, Дагъустан Республикадин талукь къуллугърин чалишмишвал себеб яз, ЦIийи Испикиз хуьруьн статусни гана.
…Кьасумхуьрелай чун ЦIийи Испикар галайвал рекье гьатна. Чепедин хивелай хуьр капун юкьвал алайди хьиз аквазва. ТIулал экIя хьанвай, кьакьан тарарин юкьва авай хуьр акурла, мецел шиирдин цIарар къвезва:
ЦIийи Испик гуьзел я
Гад алукьай береда.
Шаксуз, авач маса хуьр,
Гекъигдай и дереда.
Вичи яргъал йисара Испикрин хуьруьн администрациядин кьил яз кIвалахай, алай вахтунда АСП-дин кьилин заместитель тир Руслан Магьмудова лагьана:
— ЦIийи Испикиз хуьруьн статус гунал чун шад я. Чна сифте нубатда райондин кьил Саид Темирхановаз, республикадин кьиле авайбуруз сагърай лугьузва. Статус гуни яшайишдин месэлаяр гьялуниз, агьалийрин яшайиш, дуланажагъдин шартIар хъсан хьуниз куьмекда.
Алай вахтунда ина 160 кIвал ава, 915 кас яшамиш жезва. Агьалийрин гьал-агьвал пис туш. Абурухъ 700 мал, 1000 лапаг, верч-уьндуьшка ава.
Хуьруьн куьчеяр, гьаятар хъсан гьалда ава, анра михьи я. Райондин кьил Саид Темирханован куьмекдалди хуьруьн администрациядилай са кьадар кIвалахар ийиз алакьнава. И карда АСП-дин кьил Рагиф Агьмедован алахъунар гзаф я.
ЦIийи Испика 3 километрдин куьчейра къир цанва. Куьчейра йифен вахтунда эквер ава. ЦIийи кьве трансформаторни эцигнава. Фельдшервилинни акушервилин пункт, контейнерар патал майдан, волейболдин, аялар къугъвадай майданар цIийивилер я.
Хуьруьн агьалийрин къуллугъда гьакI юкьван школа, хуьруьн администрация, клуб, библиотека акъвазнава.
Ватандин ЧIехи дяведин иштиракчияр хьайи испиквийрин кьегьалвилер рикIера хуьнин лишан яз, хуьруьн юкьвал обелиск эцигнава. Адахъ школьникар гелкъвезва.
— Руслан Гьажиагьмедович, алай вахтунда райондай 400-лай виниз кьегьалри Донбассда кьиле физвай махсус серенжемда иштиракзава. Куь хуьряй СВО-дин зонада шумуд кас ава? — хабар кьуна за.
— ЦIийи Испикай СВО-дин зонада 18 касди иштиракзава. Абурукай гзафбурухъ шабагьар ава. Вирида къуллугъдин везифаяр намуслудаказ кьилиз акъудзава. СВО-дин вири иштиракчийриз чна социальный паспортар гьазурнава. Абура махсус серенжемдин иштиракчийрин ва хизанрин истемишунар, социальный гьалар къалурнава. Абур патал чна тайин кIвалах тухузва. Мисал яз, СВО-дин иштиракчийриз, абурун тIалабунриз килигна, арендадин къайдада чилин 5 участок (гьар садаз — 50 сотых) чара авунва. Отпускдиз хуьруьз хтай СВО-дин иштиракчийрихъ галаз гуьруьшар тешкилун чи администрациядиз адет хьанвай кар я…
Агьалийри ЦIийи Испик гележегда мадни вилик фидайдахъ инанмишвал къалурна. Ина чилин къадир авай, зегьметдал рикI алай, четинвилерихъай кичIе тушир ватанперес, мугьманперес инсанар яшамиш жезва.
Хазран Кьасумов
