Алатай гьафтедин ял ядай йикъара Махачкъалада, «Труд» стадиондал, Дагъустандин Кьилин призар патал республикадин гьукумдин идарайрин командайрин арада мини-футболдай акъажунар кьиле фена. Ана 20-далай виниз командайри иштиракна. Къугъунрин кьвед лагьай юкъуз кьиле фейи ярумчух финалар ва финалар иллаки къизгъинбур хьана. ИкI, Дагъустандин чилерин ва эменнидин алакъайрин министерстводин команда 1-чкадиз лайихлу хьана. РД-дин тIебиатдин ресурсрин ва экологиядин министерстводин — 2, Дагъустандин Кьилин ва Гьукуматдин Администрациядин командайри 3-чкаяр кьуна.
Акъажунар агалуниз талукьарнавай шад мярекатдал Дагъустандин Гьукуматдин Председатель Абдулмуслим Абдулмуслимова турнирдин вири иштиракчийриз къизгъин ва итижлу кьугъунрай сагърай лагьана. Турнир хъсан адетдиз элкъведайди ва гьар йисуз кьиле тухудайди къейдна.
— Вири командайри устадвал къалурна. Азад вахтунда гзафбур футбол къугъвазвайди, хъсан гьазурвал акунвайди ва къугъунив гьевесдивди эгечIнавайди аквазвай. Гьа са вахтунда спортдин дуствили агъавалзавайдини кьатIуз жезвай. Сагърай куьн рикIел аламукьдай ихьтин легьзеяр багъишунай! Куь вилик кIвалахдин жавабдар гьафте ква. Ихьтин зирингдаказ кьиле тухвай ял ядай йикъарилай кьулухъ кIвалахдив куьн, умудлу я, руьгь шад ва кIубан яз эгечIда, — къейдна ада.
А. Абдулмуслимова вичин ва Дагъустандин Кьилин тIварунихъай акъажунрин гъалибчийриз ва призёрриз агалкьунар тебрикна, акъажунар Сергей Меликован куьмек галаз кьиле тухвайдакай лагьана. ИкI, Дагъустандин экономикадин ва мулкар вилик финин министерстводин 100 йисан юбилейдихъ галаз алакъалу яз, Дагъустандин Кьили махсус призар тайинарнавай.
Шад мярекатдал гъалибчи командадив А. Абдулмуслимова кьилин пишкеш — Кубок — призерар тир командайрив пишкешар — Россиядин Федерациядин Игит Темирлан Абуталимова, РД-дин Кьилин ва Гьукуматдин Администрациядин регьбер Махач Омарова вахкана.
«Виридалайни хъсан къапучи», «Виридалайни хъсан гьужумдайди», «Виридалайни хъсандиз къугъвадайди» пулдин пишкешар гуналди къейдна.
Турнирдин сергьятра аваз, СВО-дин иштиракчийрин, Росгвардиядин телеф хьайи къуллугъчийрин аяларни фикир тагана тунач. Багьа мугьманрин жергеда авай абуруз Сергей Меликован тIварунихъай кабминдин Кьили рикIел аламукьдай пишкешар — Махачкъаладин «Динамо» командадин футболистрин къулар алай тупар, клубдин болельщикрин шарфар ва спортдин тадаракар — гана.
Турнирдин макьсад сагълам уьмуьр тухун ва спортдал машгъул хьун машгьурунихъ, гьакI, винидихъни къейднавайвал, Дагъустандин экономикадин сад лагьай къуллугъ арадал атана 100 йис тамам хьунин юбилейдихъ галаз алакъалу тир.
Турнир тешкиллувал аваз, кьиле фена. Адан сергьятра аваз, аялар патал машгъулардай жуьреба-жуьре мярекатарни тешкилнавай. ЧIехибур патал ГТО-дин нормаяр вахкудай ва «Болельщикдин карта» ацIурдай мумкинвални яратмишнавай.
Рагнеда Рамалданова
