12-октябрдиз Махачкъалада кIвачин къапар акъуддай цIийи “SERG” фабрика (карханадин иеси — Сиражудин Гьуьсейнов) ачухна. Дишегьлийрин ва итимрин кIвачин къапар акъудунал маш-гъул “Серж” фабрикади и хилен базарда кIвалахиз 20 йисалай гзаф вахт я. Карханади акъудзавай шейэр кIвачин къапарин “КАRI” компаниядин туьквенрани, амадагвилин бинедаллаз, маса гузва. Производстводин цIийи майдан санлай къачурла 4 агъзур кв.метрдиз барабар я. Ана 100-дав агакьна цIийи тадаракар эцигнава. Санлай къачурла, фабрикадиз 200 миллион манат инвестицияр серфнава.
Фабрикадихъ йиса 300 агъзур жуьт кIвачин къапар акъуддай мумкинвал ава. Карханади тамам къуватдалди кIвалах башламишайла, адавай йиса 500-600 агъзур жуьт акъудиз жеда.
Алай вахтунда фабрикада официальнидаказ кIвалахдалди таъминарнавай 120 касди зегьмет чIугвазва. Абурун юкьван мажиб 35 агъзур манатдиз барабар я. Рабочийриз къулайдаказ кIвалахун патал вири шартIар тешкилнава: михьивал ийидай ва тIуьн гудай чкаяр ава.
Фабрика ачухунин шад мярекатда РД-дин Гьукуматдин Председателдин сад лагьай заместитель Батыр Эмеева, международный “KARI” компаниядин руководитель Игорь Яковлева иштиракна.
Республикадин Гьукуматдин пресс-къуллугъди хабар гайивал, йисан эхирдалди Дагъустанда мад 3 фабрика ачухун пландик ква.
«Лезги газет»
