РД-дин экономикадин ва мулкар виликди тухунин министерстводи “Дагъустан Республикадин дагълух мулкар яшайишдинни экономикадин жигьетдай вилик тухун” государстводин программа уьмуьрдиз кечирмишунин кIва-лах кьиле тухузва.
РикIел хкин, “Дагъустан Республикадин дагълух мулкар яшайишдинни экономикадин жигьетдай виликди тухун” государстводин программа РД-дин Гьукуматди 2020-йисан 18-февралдиз тестикьарнай. Программа кардик кутунин макьсад, къейднавайвал, республикадин дагълух мулкара арадал атанвай яшайишдин гьалар, агьалийрин дуланажагъдин ери хъсан патахъ дегишарун, дагъдин чкайрин экономика дурумлудаказ виликди фин таъминарун я. Ам 2020-2024-йисарин вахтунда уьмуьрдиз кечирмишун фикирда кьунва.
2021-йисан 1-июндин делилралди, программада иштиракун патал санлай къачурла 46,2 миллион манат тешкилзавай 87 арза агакьнава, абурукай авунвай харжийрин тайин кьадар пай эвез хъувунин субсидийри 23 миллион манат тешкилзава. 49 иштиракчидихъ галаз 8 миллион манатдилай гзаф кьадарда аваз субсидияр гунин гьакъиндай икьрарар кутIуннава.
Министерствода къейд авурвал, мумкин тир 33 муниципалитетдикай программада иштиракунин гьакъиндай арзаяр анжах 18 районди ганва. Конкурсдай абурукай анжах 134 арза акъатнава. Идаради гъавурда твазвайвал, арзаяр кьабул тавунин себебрикай сад ам я хьи, агакьарнавай документри программади тайинарнавай истемишунриз жаваб гузвач. Къейд ийин, государстводин патай куьмек къачун патал арзаяр 2021-йисан 15-ноябрдалди кьабулзава.
Конкурсда иштиракунин чарасуз шартI инвестицияр серф ийизвай проект гьуьлуьн дережадилай 500 метрдин кьакьанда хьун я. Ихьтин истемишуниз республикадин муниципальный 30 районда авай агъзурдалай виниз хуьрери жаваб гузва.
Программадин сергьятра аваз гузвай куьмекдин бинеда промышленностдин продукция, недай суьрсет ва хъвадай шейэр акъудун патал маса къачузвай тадаракриз, теплицаяр, хуьруьн майишатдин суьрсет хуьдай ва санай масаниз рекье твадай логистикадин центр (майвайрин ва емишрин гьамбарханаяр) эцигуниз авунвай харжийрин пай (50 процентдив агакьна) эвез хъувун ава.
“Программади фикирда кьунвай куьмек республикадин дагълух чкайра эхиримжи пуд йисалай тIимил тушир вахунда майишатчивилин кIвалах кьиле тухузвай ва чеб карчияр хьиз регистрация авунвай агьалийриз гузва”, — лугьузва министерстводин векилди.
ГьакIни, субсидияр хсуси куьмекдин майишатар авай ксаривайни къачуз жеда. Абуруз гун фикирда кьунвай куьмек гъвечIи жуьредин техника маса къачуниз ийизвай харжийрин тайин пай эвез хъувуникай ибарат я. Идалайни гъейри, госпрограммадин сергьятра аваз республикадин арандин мулкарай тир, амма чпиз дагълух чкайра ветеринарвилин, агрономвилин, зоотехниквилин ва хуьруьн майишатдин механизаторвилин пешейрай кIвалахиз кIанзавай ксаризни са сеферда яз куьмекдин пул гуда.
Программада иштиракун патал арзаяр РД-дин экономикадин ва мулкар виликди тухунин министерствода ва МФЦ-да кьабулзава.
«Лезги газет»
