Алай йисан январдилай къуватда гьатнавай къанунрикай сад интернетда наркотикрин таблигъат тухунай ва абур реклама авунай миллионни вад виш агъзур (1 500 000) манатдив агакьна жерме авуниз талукьди я. Идалайни гъейри, Роскомнадзордин истемишуналди ихьтин малуматар агал тавунай алакъайрин операторриз, интернет-провайдерриз талукь жавабдарвални мягькемарнава.
Россиядин къанундин истемишунрив кьурвал, эгер сайтрин сагьибри интернетдин чинриз акъуднавай хаталу малуматар чIур тавуртIа, ахьтин ксар 8 миллиондив агакьна жерме ийида. Ихтилат экстремиствилиз, наркотикар гьазуруниз, абур ишлемишуниз ва ихьтин маса къадагъалу крариз талукь малуматрикай физва.
Шулугъчивилиз (хулиганство) талукь РФ-дин УК-дин 213-статьядикни уголовный жавабдарвал гужлу авунин дегишвилер кухтунва.
Чиновникри ва жавабдар къуллугърал алай ксари ватандашрин намусдик хкIурдай гьерекатриз рехъ гайитIа, абур 150 агъзур манатдал кьван жерме ийида. Мадни, эдебсузвал къалурай чиновникриз кьве йисуз кьван гьукуматдин органра кIвалахдай ихтиярар амукьдач.
«Лезги газет»
