Чи ватанэгьлияр — гьар сана
Жегьил лезги Артур Исрафилович Пирмегьамедов 2015-йисуз кьисметди Франциядин Клиссон шегьердиз акъудна. Ам 1983-йисан 27-августдиз Сулейман-Стальский райондин Эминхуьряй тир Исрафил Саидовичанни Чуьхверхуьряй тир Эльмира Ярагьмедовнадин хизанда дидедиз хьана. Алай вахтунда чи ватанэгьли Франциядин Бас-Гуленда яшамиш жезва.
1999-йисуз Махачкъалада Дагъустандинни Туьркиядин колледж куьтягьайдалай кьулухъ Артура кьилин образование къачуна. ДГПУ-дин къецепатан чIаларин факультетдик экечIна ва 2004-йисуз анаг агалкьунралди куьтягьна. 2006-йисуз ам ДГПУ-дин къецепатан чIаларин факультетда ингилис чIалан муаллим яз кIвалахдив эгечIна. Са йисан вахтунда ина студентриз тарсар гана, ахпа ДГИНХ-да кIвалах давамар хъувуна.
2007-2014-йисара ДГИНХ-дин “Теория и практика перевода” кафедрада чIехи преподаватель яз кIвалахна, вузда ада мектебда кIелзавайбур патал къецепатан чIаларин махсус мектеб ва ЕГЭ-диз гьазурвилер акунин курсар тешкилна.
Францияда чкадин танишрин куьмекдалди Артура образованидин центрайрихъ галаз алакъаяр арадал гъана. Францияда пешедин рекьяй ада сифте волонтердин еринда хсуси мектебда чIехибуруз ингилис чIалан тарсар гана. ЦIийи чкада, цIийи шартIара цIийи инсанрихъ галаз таниш хьана, кIвалахдин тежриба къачуна. Исятда ада вич Францияда кIвачи чил кьунвай агьали хьиз гьиссзава.
Ада вичиз куьмекар гайи са жерге французрин тIварарни кьазва, иллаки Бернард Расселалай разивалзава. “Б.Рассел зи насигьатчини, дустни я. Ам хьаначиртIа, цIийи чкада зи уьмуьр масакIа хьун мумкин тир”, — лугьузва ада.
2018-йисан мартдиз ватанэгьли вилик эцигай макьсаддив агакьна. Къецепатан чIалариз талукь кьилин образованидин диплом тестикьарунин гьакъиндай яргъал вахтунда давам хьайи гьерекатрин нетижада Франциядин образованидин министерстводай разивилин жаваб агакьна. Махсус лицензияди жегьил пешекардиз Франциядин турпагъра гьукуматдин ва хсуси образованидин вири идарайра ингилис чIалан тарсар гудай ихтиярар гузва.
2017-йисан декабрдилай ам Бас-Гулен шегьерда яшамиш жезва. Асул пешедилай алава яз, Артур Пирмегьамедова туриствилиз талукь “TeIeport France” проектдин винелни кIвалахзава. Гележегда адаз урус чIалал рахазвай ксар патал РагъакIидай патан Францияда сиягьатар тешкилдай фикир ава.
Ватандихъ галаз фин-хтунин алакъаяр авани лагьана хабар кьурла, Артура заз ихьтин жаваб гана: “Авайвал лагьайтIа, иниз куьч хьайидалай кьулухъ тек са сеферда — 2019-йисан гатуз — хизанни галаз хъфена. Тарихдинни географиядин рекьяй хъсан пешекар тир Айвар имиди заз чи куьгьне Хутаргърин хуьре хъсан сиягьатни тешкилна. А гатуз чун Шалбуз дагъдизни хкаж хьана. Гуьгъуьнлай за шикилар ва видеояр французриз къалурайла, абуру чи тIебиатдал гзаф гьейранвална. Нубатдин сеферда заз французви дустарни галаз хкведай къаст ава”.
Ватанэгьлиди къейд авурвал, Францияда яшамиш жезвай 5 лезги хизан вичиз малум я, абурукай пуд Нант шегьерда ава.
“Франциядикай рахайтIа, инаг са маса алем я. Гьахъ патал лугьун хьи, ина адетриз, медениятдин ивирриз еке къимет гузва. “Вичин миллетдин тарих чин тийизвай инсандихъ гележег авач!” — ибур французрин сивяй мукьвал-мукьвал ван жезвай келимаяр я. Европавийрин хъсан ерийрикай сад чпин тарихдиз къимет гуз, адалди дамах ийиз чир хьун, ихьтин месэлайрив къадирлувилелди эгечIун я”, — алава хъийизва Артур муаллимди.
Къариблухда аватIани, ада дуланажагъдилай, ана авай шартIарилай, здравоохраненидин гьаларилай разивалзава. Артур Пирмегьамедован хизанда мектебда кIелзавай 2 гъвечIи аялдиз тербия гузва. Къуй ам вичин вири мурадрив агакьрай!
К.Ферзалиев
