ЦIийи йисан вилик Дербент райондин Белиждинни Мамедкъаладин гимназийра, Хазардин, ЛукIарин ва Мамедкъаладин 2-нумрадин умуми образованидин школайра милли “Образование” проектдин “Алай аямдин школа” федеральный проект уьмуьрдиз кечирмишунин сергьятра аваз тIебии илимдин ва технологиядин рекьяй образованидин “Точка роста” центраяр шад гьалара ачухна.
Хазарда “Точка роста” центр ачухзавай мярекатда райондин кьил Мавсум Рагьимова, райондин кьилин заместитель Икрам Бабетова, образованидин управленидин начальник Сона Гьажибеговади, школадин директор Суфьян Надирова, диде-бубайри, муаллимри, аялри ва масабуру иштиракна.
М. Рагьимова, кIватI хьанвайбуруз и чIехи вакъиа мубарак авуналди, ана илимдин рекье чирвилер къачудай аялриз аквадай хьтин агалкьунар ва школадин вири коллективдиз яратмишунрин яцIа аваз кIелунин йис хъсан нетижаяр аваз акьалтIардай мягькем сагъламвал хьана кIанзавайдакай лагьана.
Образованидин “Точка роста” центр школайра ачухунихъ чIехи важиблувал ава. Ихьтин центрайрин кьилин макьсад образованидин ери хкажун, хуьруьн школайра химиядин, биологиядин, физикадин, технологиядин предметрай ва алава образованидин программайрай чирвилер къачузвай аялрин мумкинвилер гегьеншарун я.
Школайра кардик кутунвай цIийи кабинетар федеральный проектдин сергьятра аваз гужлу компьютерралди, 3D-принтерралди, квадрокоптерралди ва алай аямдин маса техникадалди таъминарнава.
Къагьриман Ибрагьимов
