18-ноябрдиз Дербент шегьерда, СтIал Сулейманан тIварцIихъ галай лезги муздрамтеатрда, «Возрождение Дербента» фондунин куьмекдалди шегьердин мектебра кIелзавай аялрин арада шаир, гьикаятчи, драматург Седакъет Керимовадин «Чун лекьер я!» шиир хъсандиз кIелунай тешкилнавай конкурс кьиле фена.
Кьве гаф фондуникай. Ам тешкилнавайди Дагъустандин Халкьдин Собранидин депутат, машгьур меценат Имам Музамудинович Яралиев я. Фондуни тек са Дербент шегьерда ваъ, вири Кьиблепатан Дагъустанда гзаф хийирлу крарик кьил кутунва ва икьван гагьда ада вишералди инсанриз куьмекар ганва.
Фондуни медениятдин ва образованидин хилерани гзаф кIвалахар кьиле тухузва. Ада Дагъустандин халкьарин милли меденият, чIалар ва адетар хуьнин ва вилик тухунин кардик кутазвай пайни екеди я. Аялрин арада кьиле фейи конкурсдини и кар нубатдин сеферда тестикьарна.
Конкурсда иштиракзавайбуруз агалкьунар хьун алхиш авуналди, мярекат Лезги театрдин директор, жюридин председатель Динара Эминовади ачухна.
Санлай къачурла ана 12 мектебдай 24 аялди иштиракна. Къейд ийин хьи, конкурсдиз аялар муаллимри лап хъсандиз гьазурнавай.
Аялрин алакьунриз къимет гузвай жюридик Лезги театрдин директор Динара Эминова — председатель, Лезги театрдин кьилин режиссер, РД-дин лайихлу артист Казбек Думаев, РД-дин искусствойрин лайихлу деятель, композитор, «Лезги газетдин» хсуси мухбир Къагьриман Ибрагьимов, Дербентдин педколлеждин лезги чIаланни литературадин муаллимар Рагнета Алибегова ва Эльнара Шабанова (членар) квай.
Жюридиз хъсанбурун арадай хъсанбур хкягъиз пара четин хьана, гьикI лагьайтIа, саки вирида шиирар хуралай фасагьатдиз кIелнавай.
Нетижада 1-чкадиз Муьгьуьдин Гьасанов (дуьньядин медениятдин гимназия, 7-кл., муаллим — Ж. Амаханова), 2-чкайриз Перис Исева (СОШ №11, 7-кл., муаллим — А. Жаватова) ва Амина Якьубова (СОШ №15, 7-кл., муаллим — Р. Алиева), 3-чкайриз Абдулла Исаев (СОШ №11, 3-кл., муаллим — Н. Бабаева), Амир Наврузов (СОШ №3, 6-кл., муаллим — Ш. Велиева) ва Фатима Яралиева (дуьньядин медениятдин гимназия, 5-кл., муаллим — Т. Магьмудова) лайихлу хьана.
Гъалиб хьайи хьайи аялрив ва абур гьазурай муаллимрив гьар садав 1-чкадай -15, 2-чкадай –10 ва 3-чкадай 7 агъзур манатдин кьадарда авай пулдин пишкешарни грамотаяр «Возрождение Дербента» фондунин крар идара ийизвай директор, шаир ва алим Азиз Мирзабекова вахкана. Тележурналист Мизамудин Магьмудова кIвенкIвечи чкаяр кьур аялризни абурун муаллимриз Шарафутдин Фатуллаева цIийиз ахкъуд хъувунвай «Урус чIаланни лезги чIалан словарь» пишкешна. ГьакIни конкурсда чкаяр тахьай вири аялрин муаллимрин зегьмет сертификатар гуналди къейдна.
Къагьриман Ибрагьимов
