Фестиваль
Дербент райондин администрациядин спортдин, туризмдин, жегьилрин сиясатдин ва культурадин крарин рекьяй управлениди “Чуду Фест 2021” тlвар алаз I конкурс-фестиваль кьиле тухвана. Им кулинариядин, мадни дуьз лагьайтlа, адетдин къайдадин афарар гьазурунин рекьяй мярекат тир. Адан метлебни — тарихдихъ, медениятдихъ, адетрихъни къайдайрихъ, халкьарин яшайишдихъ, суваррихъ, искусстводихъ ва райондин агьалийрин гъилин сеняткарвилихъ галаз танишарун.
Малум тирвал, афарар дагъустанвийрин милли тlуьнрикай сад, абур гьазурзавай затlарни бул я: регъвей як, хъчар, куьлуь авунвай картуфар, буран, мукаш…
Конкурсда Мамедкъала поселокдай, Берикейдай, Рубасдай ва ЛукIарикай атанвай дишегьлийри иштиракна. Абуру афарар гьазурунин рекьяй чпин устадвал къалурна, абур тIяамлубур хьунин сирер ачухна. Якни картуфар, хъчар, буран, мукаш ва ниси туна ацlурнавай афарар чранвай.
Фестиваль са гьафтеда давам хьана.
Къагьриман Ибрагьимов
