Вири гьевесламишдай “лезгинка” кьуьлуьникай ван тахьай кас авач жеди. Лезгийрикай чпикай, абурун милли парталдикай вуч чида? Лезгийрихъ чпин хсуси адетар, кьетIен культура ава. Халкьдиз хас тир милли парталрикай гзаф рахада, амма абуру миллетдин гьихьтин терефар къалурзаватIа, са акьван фикир гузвач. И парталрин гьар са паюнихъ вичин метлеб, мана ава.
Лезги дишегьлидин партал сифтедай яргъиди ва яргъи хилер галай перем тир. Адан кIаникай шалвар алукIдай, шалвардин кикер перемдикай хкатдай. Абурал гуьрчегдаказ нехишар атIудай.
ХIX асирдин эхирра булушка пайда хьана. Ам гьарда вичиз кIандайвал, гьяркьуь хилер галаз цвадай. Булушка гьам рушари, гьам яшлу дишегьлийри алукIдай. Ам анжах рангаралди тафаватлу жедай. Жегьилри, яни рушари — экуь, яшлубуру — мичIи рангаринбур, кIвачерал, адет яз, хранвай гуьлуьтар, кьелечI тумаждикай цванвай кIвачин къапар алукIдай.
ЧIарар дишегьлийри шуткьудик кIватIдай. Шалар — пекдинбур, парчадинбур, сунбур алукIдай. Дишегьлиди шалуналди чинин са пай ва сив кIевун эдебдин кар яз гьисабдай. И кар анжах гъуьлуьк квай ва яшлу дишегьлийриз талукь тир. Гимишдин безекрал лезги дишегьлидин рикI гзаф алай, парталдив кьадайвал жуьреба-жуьре безекар — цамар, япагьанар хкядай, парталар гимишдин пуларалди чIагурдай. Гимиш пис кардиз кичI гудайди, хъсан крар желбдайди яз гьисаб0завай.
Лезги рушан кьетIен дамах чIарар тир. Кьве киф храдай. Руш са киф галаз къекъвез хьайитIа, ам ялгъуз амукьда лугьудай.
Вахтуни виликди гьерекатзава, пек-партал алукIунуни. Исятда Махачкъаладин куьчейра милли партал алай руш бажагьат гьалтда. Гьар са девирдихъ вичин пек-партал ава.
Эмиля Адилханова,
ДГУ-дин журналистикадин отделенидин
3-курсунин студентка
