Зун вуж я?
Салам, гьуьрметлу “Лезги газетдин” редакция !
Зун Багьадурова Имарат, зи 14 йис я . За КIирийрин Советрин Союздин Игит Эсед Бабастанович Салигьован тIварунихъ галай юкьван школада 8-классда кIелзава. Зи саки вири предметрал рикI ала. Чи школада гьар жуьредин секциярни кружокар ава. Зани волейболдин секциядани ингилис ва дидед чIаларин кружокра иштиракзава.
Заз манияр ягъиз, кьуьлер ийиз, гьайванрихъ гелкъвез, жуван дустарихъ галаз къугъунар ийиз, интернетдиз гьахьиз кIанда…
Зун яратмишунрал рикI алай ва чанда гьевес авай инсан я . Мукьвал-мукьвал шиирарни туькIуьрда, бязи вахтара гьикаядин жуьредин шиирар туькIуьрунални зи рикI ала.
Заз жуьреба-жуьре гъилин кIвалахарни ийиз кIанда. Маса аялрин яратмишунризни кинойриз килигун иллаки заз хуш я.
Вахтни акваз-такваз физва. Диктантарни контрольнияр, уравнениярни задачаяр, тарихдин чIехи алимар ва тIебиатдин аламатар чириз, ингье зун 8-классдиз акъатнава. Зи фикир саки вири шейэрал желб жезва. Белки, гьавиляй я жеди за школада “кьудралдини” “вадралди” кIелни ийизвайди…
Имарат Багьадурова
Гатфариз
Кьуьд хъфена, алукьна гатфар,
Къацу хьана чи багълар.
Вири аялар шад я хьи,
Лап хъсандиз къугъвада хьи…
Тарари ийида тIурар,
Ахпа жеда цуькверин сувар.
Хъфейла гатфар, алукьда мад гад,
Инсанар жеда мадни пара шад.
Манияр лугьуз, кьуьлер ийиз,
Физ чуьллериз, шадвилер ийиз,
Ни чIугваз, кIватIиз цуьквер,
Лап хъсанди жеда ширин бегьер.
Школа
Школадиз фенва аял,
Жеда ам гила кьегьал,
Пакамахъ хъвер алаз сивел,
Зи а вахтар алама рикIел.
Жедай зун гьар юкъуз,
Школа кIанда лугьуз.
Мус аквадатIа заз дустар,
Доскадал физ, лугьуз тарсар?..
Гъиле аваз цуькверин кIунчI,
Катиз фидай школадиз зун.
Учительница акур чIавуз
КIан жедай заз цуьк багъишиз.
Хъуьрез-хъуьрез, дустар галаз,
“Вад” къачуна хкведай зун.
РакIарамаз ам къалуриз,
Алахъдай зун диде шадиз.
Амма физва йикъар, йисар,
РикIелай алатдач а вахтар.
Лугьузва квезни за, зи дустар,
Школадин кIан хьухь квезйикъар!
_________________________________________________________
Конкурсрин гъалибчияр
Мегьарамдхуьруьн райондин Советский хуьруьн юкьван мектебда кардик квай “Жегьил шаир” кружокдин членар тир Абдул Хасплатов ва Амина Пашаева, республикадин дережада аваз, “Къизилдин зул” лишандик кваз аялрин арада кьиле тухвай шииратдин конкурсда дипломриз лайихлу хьана.
Агъадихъ абурун шикилар ва эсерар чапзава.
Абдул Хасплатов, 7-“б” классдин ученик
Зул
Куьруь жезва мад йикъар,
Къвада чIимелар — марфар.
Цавал акьалтна цифер,
Хизанра жез мехъер.
Тарари пеш юзурда,
Хъипи гьамга къалурда.
Инсанри емиш кIватIиз ,
Гьазурвилер из хъуьтIуьз.
Къушар чими уьлквейриз
КIвачин хьанва мад хъфиз.
Тарар-тамар, хъипи ранг
ЧукIурай хьиз, къизил чанг.
Ял ягъунар куьтягьна,
Тарсариз мад темягьна.
Къачуз хъсан къиметар,
Ийиз тадач туьгьметар.
Диде-буба, муаллимар!
Къачуда чна илимар.
Школад тIвар хкажда,
“ЧIурухъанар” акъашда.
Уьлкведин тIвар вине кьаз,
Ватан чи, кьин кьазва ваз.
Артух хьун патал девлет,
Хъсандиз чIугвада зегьмет.
______________________________________________________
Амина Пашаева, 8-“а” классдин ученица
Атана чаз къизилдин зул
Тарал алай хъипи пешер
АтIузвайди — гужлу “мишер”.
Гьарнихъай къвез ширин сесер,
Атана чаз къизилдин зул.
Тамун чилел туькIуьриз мес,
КIвачин кIаник — тIакь-тIакьдин сес.
Илгьамдикни кутаз гьевес,
Атана чаз къизилдин зул.
Багъдай кIватIиз емишар бул,
Инсанарни ийиз кьабул,
Жемятди вахчузва “дул”,
Атана чаз къизилдин зул.
Ахъа хьана мектебдин вар,
БицIекриз чи хьана сувар.
Илим къачуз мад, аялар,
Атана чаз къизилдин зул.
Зул я хьи чи берекатд вахт,
Зегьмет чIугун — инсандин бахт,
Дережа хьуй гьар садаз тахт,
Атана чаз къизилдин зул.
________________________________________________________
Румина Савзиханова — Герейханован хуьруьн 1-нумрадин СОШ-дин 8-“а” классдин ученица
Шиирар лап хъсандиз хуралай кIелунал Руминадин гзаф рикI ала.
(Шикил ягъайди — В.Жамалдинов)
