Машгьур журналист Алик Абдулгьамидова РД-дин Кьил Владимир Васильевавай Дагъустандин государстводин университетдиз XX асирдин Гомер СтIал Сулейманан тIвар хгун тIалабнава.
В.Васильеваз рекье тунвай чарче журналистди СтIал Сулеймана чи республикадин тарихда гьихьтин гел тунватIа къейднава ва 1937-йисуз, шаир рагьметдиз фейидалай кьулухъ, Дагъустандин педагогвилин институтдиз адан тIвар гайиди рикIел хкизва. Къейд ийин хьи, СтIал Сулейманан тIвар вуздал вучиз ятIани, 1957-йисалай аламукьнач.
“XX асирдин Гомеран яратмишунрихъ тарихдин ва жемиятдинни сиясатдин жигьетдай авай метлеб фикирда кьуна ва гьахъвал арадал хкун патал за Квевай Дагъустандин государстводин педагогвилин институтдиз (1957-йисалай — Дагъустандин государстводин университет) чIехи шаирдин тIвар хгунин карда куьмек гун тIалабзава. СтIал Сулейманан 150 йисан юбилей къейдзавай йисуз ихьтин кар шаирдин садрани рекьин тийидай ирсинин къайгъударар патал еке савкьат жедай”, — кхьенва Алик Абдулгьамидова.
«Лезги газет»
