Докъузпара райондин Усугъчай хуьруьн «Чубарук» аялрин бахчада «Залзала хьайи ва цlай кьур дуьшуьшра аялрин бахчадин къуллугъчийрин ва аялрин гьерекатар» темадай чирвилер гунин серенжем кьиле фена. Вердишвилерин серенжем садлагьана арадал къведай чlуру дуьшуьшра авуна кlани гьерекатриз къуллугъчияр ва аялар гьикl гьазур ятlа ахтармишунин макьсаддалди тешкилна.

Хатасузвилин культурадин йисан сергьятра аваз 2018-йисуз тухудай мярекатрин пландин бинедаллаз мярекат ГО-дин ва ЧС-дин крарин рекьяй тамам ихтиярар авайдан, ЕДДС-дин, АТК-дин 37-нумрадин пожарный частунин къуватралдини такьатралди саналди 24-августдиз кьиле тухвана.

Кьилди къачуртlа, серенжемдин сергьятра аваз кьетlен гьалара тапшуругъар кьилиз акъудунин гьазурлухвал, чlуру гьалар арадал атайла хабар гунин система,  гьакlни хасаратрин гьакъиндай виликамаз малумарунин жигьетдай тухузвай серенжемрин таъсирлувал ва икl маса месэлаярни ахтармишна.

Аялар ва къуллугъчияр бахчадин дараматдай къецихъ акъудна. Администрациядин къуллугъчийри аялрин бахчадин коллективдиз залзала хьайи дуьшуьшда гьикl тухун лазим ятlа галай-галайвал ихтилатна. Дарамат юзай вахтунда къалабулух акат тавун ва 15-20 секундда тадиз дараматдай экъечlун герек тирди яб акалзавайбуруз чир хьана. Гьа са вахтунда лап чарасуз документар, пул тади гьалда вахчуна, дараматдин гурарай ва я лифтинай экъечlун ва къецелни дараматдин мукьув акъваз тавун чарасуз тирди чир хьана.

Цlаяр кьунин дуьшуьшар арадал татун патални меслятар гана. Месела, газ ахъа хьайи вахтунда шемер, спичкаяр, зажигалкаяр ишлемишун къадагъа я.

Мярекатдин сергьятра аваз, цlай хкадардай затlар ишлемишунин къайдайрикай, медицинадин рекьяй сифте куьмек гуникай чирвал гана.

«Лезги газет»