Дербент шегьердин агьали, ата-бубайрилай лифер хуьнал машгъул Нияз Авсетова Кеферпатан Кавказда виридалайни чIехиди тир вичин фермада 60 жинсинин лифер хуьзва.
“ОТР” каналдай къалурнавай репортажда Севрина Шамхаловади хабар гузвайвал, Авсетоврин хизан датIана и кардал машгъул яз им пуд лагьай асир я. Къушар Н.Авсетован бубади, чIехи бубади ва гьатта ата-бубайрини кваз хуьзвай.
Хизандин алай вахтунин кьили вичин лифериз гьар юкъуз балугърин кIарабрин гъуьр, какадин регъвенвай хъире ва хъипи кьар какадарна пакаман тIуьн гьазурзава. Ихьтин къаришмади, адан гафаралди, къушар минералралди ва кфетлу маса шейэралди бес кьадарда таъминарзава.
Алай вахтунда Авсетоврихъ жуьреба-жуьре 60 жинсинин 3 агъзурдалай гзаф къушар ава.
Ниязан руш Сара Худавердиевади къейдзавайвал, бубадин машгъулат са кьадардин харжияр галайди ятIани, ам вири хизандиз хуш я.
Нияз Авсетован гьисабунралди, са йисан вахтунда лифери 15 тонндив агакьна техил незва. Идалайни гъейри, абуруз жуьреба-жуьре витаминар ва менфятлу шейэр лазим я. Абур маса къачун вири санлай йиса 150 агъзур манатдай акъваззава. Бязи вахтара, месела, лифер суварар ва мехъерар тешкилзавай ксари ижарада къачурла, Ниязавай вичи вердишарнавай къушарин куьмекдалди са тIимил къазанмишиз жезва. Амма Нияз вич агьвалдин жигьетдай хийирдихъ къекъвезвач, ада лифер лезет, рикIин хушвал патал хуьзва.
Бязи лифер Нияза Дагъустанда кьуна, амайбур лагьайтIа, маса регионра кьиле фейи выставкайрай маса къачунва.
“Абур галачиз захъ уьмуьр авач. Заз абур гзаф кIанда. Абур заз кьвед лагьай хизан хьиз я. Жедач завай абур галачиз. За абур армияда авайлани хуьзвайди тир. Жув гьина хьайитIани, за абур хуьда”, — лугьузва Нияза.
Авсетоврин хизанда лифер хуьнал машгъул ксарин муьжуьд лагьай несил акьалтзава — Ниязаз къушарихъ гелкъвез гила хтул Теймура куьмек гуз башламишнава. ЧIехи бубадихъ са шумуд йисалай вичин вири коллекция хтулдив вугудай ният ава. А чIавалди адаз къушарин кьадар 7 агъзурдал агакьдалди артухариз кIанзава.
Гьазурайди — Жасмина Саидова
