Яргъал йисарин гьакъисагъ зегьметдай Сулейман-Стальский райондин Кьасумхуьруьн (Алидхуьруьн) 2-нумрадин юкьван школадин директор Мамед Велибегович Велиеваз РД-дин Кьил Владимир Васильеван 2018-йисан 25-декабрдиз акъудай 170-нумрадин Указдалди Дагъустан Республикадин Гьуьрметдин грамота ганва.
Чна школада адан гъилик чирвилер къачур ученикрин дестедин, гьакI вири хуьруьнвийрин тIварунихъай Мамед Велибеговичаз шабагь рикIин сидкьидай тебрикзава.
Мадни еке агалкьунар хьана кIанивилин келимаяр шаир ва журналист Мерд Алиди туькIуьрнавай шиирдин цIараралди лугьузва:
Шумуд йисар сердер я вун саваддин,
Чирвилерин майданар мад абадиз!
Мешребда тваз гьар са къайгъу мектебдин,
Вун вилик ква, Шарвили хьиз, ажебдиз!..
Несилри вал дамахзава, тIвар кьуна,
Ви рекьяй физ, аскерар хьиз, цIар кьуна…
Мад кьакьан хьуй дережа ви гьуьрметрин,
Авайди туш эвезар ви зегьметрин…
Къейд ийиз кIанзава хьи, им Мамед Велибеговичаз ганвай сад лагьай шабагь туш. Акьалтзавай несилриз дерин чирвилер ва тербия гунай, общественный уьмуьрда активвилелди иштиракунай ам “РСФСР-дин халкьдин образованидин отличник” (1986-йис), “Дагъустан Республикадин лайихлу муаллим” (2002-йис), “РФ-дин умуми образованидин гьуьрметлу работник” лагьай гьуьрметдин тIварарин сагьибни хьана. И дережайрихъ еке тарих гала.
…Хъсан чирвилер авай жегьил пешекардиз Махачкъалада муаллимвиле акъвазун, илимдин кIвалахдал машгъул хьун теклифнай. Диде-бубадиз авай са хва яз, Мамед муаллимдивай абур ялгъуздиз таз хьаначир. 1977-йисалай хайи ерийра вичин зегьметдин рехъ давамарна. Алатнавай йисара Мамед Велибеговича, партиядин райкомдин лектор ва пропагандист яз, райондин общественно-политический уьмуьрдани активвилелди иштиракна. Адан зегьмет КПСС-дин обкомдин, райкомдин гьуьрметдин грамотаяр, къиметлу пишкешар гуналди къейдна. 12 йисуз адан шикил КПСС-дин Дагъустандин обкомдин Гьуьрметдин доскада хьана. Ам КПСС-дин ЦК-дин столдал эцигдай Ленинан медалдизни лайихлу хьанай…
Гьелбетда, наградаяр, авторитет ва гьуьрмет кьуру чкадал арадал къвезвайди туш. Ам гьар сада жуван гьар йикъан зегьметдин, алахъунрин ва алакьунрин нетижада къазанмишзава. Мамед Велибеговичан уьмуьрдин ва зегьметдин рекьиз вил вегьейтIани, гьакI я. Гьеле 1966-йисуз эцигнавай школадин куьгьне дарамат къени аялриз дерин чирвилер гудай макан яз амукьун, ам гьар йисуз “жегьиларун” директордин везифаяр 1985-йисалай инихъ кьилиз акъудзавай Мамед Велибеговичан гьакъисагъ зегьметдин ва еке чалишмишвилерин нетижа тирди талгьана жедач. Зунни а мектеб акьалтIарнавай рушарикай сад я…
Эхь, райондин, республикадин кьиле авай ксарин чалишмишвилер ва куьмекни галаз и мукьвара зи хайи маканда — Алидхуьрел фадлай вилив хуьзвай цIийи школадин дарамат ишлемишиз вахкунин вакъиани кьиле фида. Зи фикирдалди, цIийи школа Мамед Велибегович Велиеван тIварунихъ ягъайтIа, мадни хъсан кар жеда…
Рагнеда Рамалданова
